Úreıge emes úmitke qanat bitireıik – Bas múftı úndeýi

2490
Adyrna.kz Telegram

 Qazaqstan Musylmandary dinı basqarmasynyń tóraǵasy, Bas múftı Naýryzbaı qajy Taǵanuly Qurban aıt qarsańynda halyqqa úndeý jasady. Bul týraly "Adyrna"  QazAqparatqa  silteme jasap habarlaıdy. 

«Búgin kúnderdiń Sultany – qasıtetti Jumada, aılardyń ulyǵy – Zulhıdja aıynda halqymyzdyń amandyǵy men elimizdiń ıgiligi úshin jasap jatqan duǵa-tilekterińiz qabyl bolǵaı! Ardaqty Paıǵambarymyz Muhammed (oǵan Allanyń salaýaty men sálemi bolsyn) «Alla Taǵalanyń quzyrynda osy kúnde jasalǵan izgi amaldan abzal ári súıkimdi ıgi is joq» degen.

Osy kúnderi Oraza ustap, sadaqa berip, naýqastarǵa dári jetkizip, qaraýsyz qalǵan qarttar men jetimderge, kópbalaly otbasylarǵa kómektesýdiń saýaby mol. Shalǵan qurbandyq, bergen sadaqa, jasaǵan árbir ıgi amaldardyń saýabyn Alla Taǵala barshamyzǵa násip etkeı», - dedi Bas múftı Ortalyq kommýnıkaııalar qyzmetinde.

Bas múftı qasıtetti kúnder men aılarda adam balasynyń rııasyz jasaǵan qulshylyǵy men duǵasy qabyl bolatynyn jetkizdi. «Allanyń Ás-Salam – ıaǵnı amandyq pen Ásh-Shafı – shıpa berýshi kórkem esimderin ulyqtaı otyryp, dertke shaldyqqandardyń dertine shıpa suraımyz. Qaıtys bolǵandar úshin Alladan rahym, paıǵambardan shapaǵat suraımyz. Biz – ótkenge salaýat aıtyp, Allanyń araılap atqan árbir tańynan jaqsylyq kútken halyqpyz. Rýhymyzdy túsirmeı, syn saǵatynda saǵymyzdy syndyryp almaıyq.

Qadirli jamaǵat! Biz qazir syndarly sátte otyrmyz. Mundaıda halyq danalyǵy «Betege ketse bel qalar, bekter ketse el qalar, berekeń ketse ne qalar?» demeı me? Ardaqty Paıǵambarymyz aıtqandaı, jaqsy sóılep, aınaladaǵy adamdarǵa shýaq shashyp, úreıge emes úmitke qanat bitireıik. Aldymyzda kúlli ısi musylman balasy asyǵa kútken ulyq meıram – Qurban Aıt kele jatyr. Aıt qarsańynda barshańyzǵa Allanyń amandyǵy men jaqsylyǵyn tileımin», - dedi Naýryzbaı qajy Taǵanuly.

 

"Adyrna"  ulttyq portaly

Pikirler