سىرىمبەك تاۋ – بەلگىلى كاسىپكەر، «DACO-MOTORS» كومپانياسىنىڭ نەگىزىن قالاۋشى، Yokohama, Triangele كومپانيالارىنىڭ ورتالىق ازياداعى رەسمي ديستريبيۋتورى. كاسىپكەر ىندەت باستالعان كەزدەن باستاپ حالىققا كومەك بەرىپ ءجۇر. ول ءوز كومانداسىمەن بىرگە رامازان ايىندا 8300 وتباسىعا ازىق-تۇلىك تاراتتى. «ادىرنا» ۇلتتىق پورتالى قوعام بەلسەندىسىمەن بولعان سۇحباتتى نازارلارىڭىزعا ۇسىنادى.
- سىرىمبەك مىرزا، حالىققا بىلەك سىبانا كومەكتەسىپ جۇرگەن ازاماتتىڭ ءبىرىسىز. جوسپارلانعان قايىرىمدىلىق شاراسىن اياقتاعاننان كەيىن قانداي سەزىمدە بولاسىز؟
- 2008 جىلدان بەرى شامامنىڭ كەلگەنىنشە مۇقتاج جاندارعا كومەك بەرىپ ءجۇرمىن. ارينە، قايىرىمدىلىق شاراسىن اياقتاعاننان كەيىن سەزىنەتىن سەزىمدى سوزبەن ايتىپ جەتكىزۋ مۇمكىن ەمەس. بەلگىلى ءبىر قايىرىمدىلىق شاراسىن ءوز ناتيجەسىنە جەتكىزىپ، حالىققا كومەگىمدى تيگىزگەن ساتتە شارشاعانىمدى ۇمىتىپ كەتەمىن. سونىمەن قاتار، بار ەنەرگيامدى جاقسىلىققا جۇمساعانىمدى سەزىنەمىن. ال جوسپارلاعان ءىسىم ويداعىداي اياقتالماسا، قاتتى شارشاپ قالاتىنىم بار. قازىرگى تاڭدا جاڭا جوبالاردى دايىنداپ جاتىرمىز. «ءتىرى بولسام، قازاققا قىزمەت قىلماي قويمايمىن» دەپ ءاليحان بوكەيحانوۆ اتامىز ايتقانداي, الداعى ۋاقىتتا دا قايىرىمدىلىق شارالارىمدى جالعاستىرا بەرمەكپىن.
- "شۇعىلا" قورىمەن بىرىگە وتىرا شامامەن 3400 وتتەگى كونتسەنتراتورىن ساتىپ الۋعا جەتەرلىك قاراجات جينادىڭىزدار. اپپاراتتار ەلگە قاشان جەتەدى؟
- ءيا، «شۇعىلا» قايىرىمدىلىق قورىمەن بىرگە 460 ميلليون تەڭگە قارجى جينادىق. قازىرگى تاڭدا 4 مىڭ اپپاراتقا تاپسىرىس بەرىپ قويدىق. مەملەكەت اپپاراتتاردى ەلگە الىپ كەلۋ جۇمىستارىنا كومەكتەسىپ جاتىر. اللا قالاسا، ءبىرىنشى ۇشاق الداعى ەكى-ءۇش كۇندە الماتىعا كەلىپ قونادى.
- بيلىكتىڭ ىندەتپەن كۇرەسۋگە جاساپ جاتقان ءىس-شارالارىنا كوڭىلىڭىز تولا ما؟
- شىنى كەرەك، بيلىككە ەلىمىزدە ءدارى-دارمەك تاپشىلىعى بولعان كەزدە كوڭىلىمىز تولمادى. كارانتيننەن شىققان سوڭ ءسال بوساڭسىپ قالدىق. قازىر بارلىعى رەتتەلىپ كەلەدى.
- رامازان ايىندا دا ءبىراز يگى ىستەردى اتقارىپ، مۇقتاج وتباسىلارعا ازىق-تۇلىك تاراتتىڭىز. اراسىندا ون ەكى مۇشەسى ساۋ، جاعدايى جاقسى بولا تۇرا كومەك العىسى كەلگەندەر بولدى ما؟
- بەس ساۋساق بىردەي ەمەس قوي. رامازان ايىندا ءبىرشاما ءۇيدى ارالادىق. ون ەكى مۇشەسى ساۋ، جاعدايى بار ادامدارعا وزدەرىڭىزدى مۇقتاجدىققا يتەرمەڭىزدەر دەپ ۇنەمى ايتىپ وتىرامىن. ەگەر ولار راسىمەن دە ازىق-تۇلىك جاشىگىن العىسى كەلىپ تۇرسا، ارينە بەرىپ كەتەمىز. الايدا جاعدايى جاقسى بولا تۇراكومەك سۇراعان ادامدار كوپ كەزدەسپەدى.
- ەستۋىمشە، «قايىرىمدىلىق جاشىگىن» تاراتقان كەزدە «بوساپ كەتكەن ءسابىز بەردىڭىزدەر» دەپ شاعىم ايتقان جاندار بولىپتى. بۇل راس پا؟
- ءيا، ونداي ءبىر-ەكى شاعىم بولدى. كەيىننەن ول كىسىلەرگە جاعدايدى ءتۇسىندىرىپ، ءتىل تابىستىق.
- ۇيىمداستىرعان قايىرىمدىلىق شاراڭىزعا وزگە ەلدىڭ ازاماتتارى دا ۇلەس قوسىپتى. ناقتى قاي ەلدىڭ ازاماتتارىنان قارجى كەلدى؟
- ءيا، ءبىزدىڭ قايىرىمدىلىق شارامىزعا وزگە مەملەكەتتىڭ ازاماتتارى دا اقشا اۋداردى. ۋكراينا، كورەيا، رەسەي، اقش ەلدەرىنەن قارجى كەلىپ ءتۇستى. شىنى كەرەك، مەن قاتتى تاڭعالدىم. بۇل ءبىزدىڭ كومپانيانىڭ وكىلدەرى بولار دەگەن بولجام جاسادىم. سونىمەن قاتار، گونكونگ، قىتاي، موڭعوليادا تۇراتىن قانداستارىمىزدى دا شاراعا ۇلەس قوسىپ، اقشا اۋداردى.
- قازىرگى تاڭدا ادامداردىڭ ءبىر توبى يگى ىستەرمەن جان راحاتى ءۇشىن، ال ءبىر توبى تانىمال بولىپ، اتاق جيناۋ ءۇشىن اينالىسادى. جەكە باستارىن جارنامالاۋدى كوزدەيتىن جاندارعا دەگەن پىكىرىڭىز قانداي؟
- حالىق ءوزىن جارنامالاۋ ءۇشىن قايىرىمدىلىق جاسايتىن ادامداردى سەزىپ، بىلەدى دەپ ويلايمىن. سول سەبەپتى وزگەگە سىن ايتا المايمىن. ولاردىڭ باعاسىن حالىق بەرەدى. ءوز باسىم، الەۋمەتتىك جەلى جوق كەزدە دە قايىرىمدىلىقپەن اينالىستىم. بۇل اكەمنەن دارىعان قاسيەت دەپ بىلەمىن. مارقۇم اكەم كولىكتە ءتورت ادام وتىرسا دا، جولدا تۇرعان جولاۋشىنى تاستاپ كەتپەيتىن. سول كەزدە ءبىز ماشينانىڭ باگاجنيگىنە بارىپ جايعاساتىنبىز. اكەم ءبىزدى «كەڭ بولساڭ، كەم بولمايسىڭ» دەپ تاربيەلەدى. قايىرىمدىلىقتى ۇندەمەي دە جاساۋعا بولادى، الايدا وسى جولى ءبىز «شۇعىلا» قورىمەن بىرلەسە جۇمىس جاساپ جاتىرمىز. دەسە دە، كومپانيانىڭ قانشا اقشا اۋدارعانىن ايتپادىق. بۇل جولى جاساپ جاتقان ساداقامىزدى جاريا ەتتىك. جاريا ساداقانىڭ ماقساتى - ادامداردىڭ مەيىرىمىن وياتۋ. ارينە، ءبىز ءاربىر جاساعان ءىسىمىزدى حالىققا ايتا بەرمەيمىز. وسى كارانتيندە ءتورت ۇلكەن ءىس-شارا ۇيىمداستىرىپ، ەكەۋىن جاسىرىن تۇردە جاسادىق.
- ال قازىرگى ادامداردا مەيىرىمدىلىك قاسيەتى جوعالىپ بارادى دەگەن پىكىرگە كەلىسەسىز بە؟
- مەيىرىمدى جاندار ازايىپ بارا جاتىر دەپ ايتا المايمىن. مىسالى، كارانتين كەزىندە بىزگە 1700-دەي ادام ون تەڭگەدەن ميلليون تەڭگەگە دەيىن اقشا اۋداردى. ارداق نازاروۆتىڭ Alem Fighters سپورت مەكتەبى, مەيرامبەك، ساكەن اعالارىمىز ۇلكەن كومەك كورسەتتى.
- بۇگىنگى قوعام قانداي قاسيەتكە مۇقتاج؟
- ءبىزدىڭ قوعام كىشىپەيىلدىلىككە مۇقتاج دەپ ويلايمىن. قازىرگى تاڭدا ادامدار باسەكەلىستىك پەن باقتالاستىققا قۇمار. ءبىز كىشىپەيىل بولىپ، دارىگەرلەر مەن مۇعالىمدەردىڭ مارتەبەسىن كوتەرۋگە اتسالىسۋىمىز كەرەك. شىنى كەرەك، بۇگىندە بيزنەسمەندەردىڭ مارتەبەسى الدەقايدا جوعارى. نەگىزىندە ولار تومەنگى ورىندا تۇرۋى كەرەك. ءوز باسىم، ءبىرىنشى ورىنعا مۇعالىمدەر مەن دارىگەرلەردى قويامىن. كوروناۆيرۋس پاندەمياسى دا وسى مامان يەلەرىنىڭ اسا قاجەت ەكەنىن تاعى ءبىر مارتە دالەلدەدى.
- «ادىرنا» ۇلتتىق پورتالىنىڭ وقىرماندارىنا ايتار تىلەگىڭىز?
- تەك جاقسىلىققا ۇمتىلايىق!
- كوپ راقمەت! ءسىز سەكىلدى جاناشار ازاماتتار كوپ بولسىن!
اڭگىمەلەسكەن ديانا اسانوۆا،
"ادىرنا" ۇلتتىق پورتالى
Басқалармен бөлісе отырыңыз
