“پەتەر شلەميلدىڭ باسىنان وتكەن قىزىقتى تاريحى” اتتى وقۋعا تۇرارلىق، ءمانى بار كىتاپ. شاميسوننىڭ بۇل ەڭبەگىن ءتۇرلى باعىتقا ساي تالداۋعا بولادى.
شاميسوننىڭ بارىنە ورتاق «ءومىر» اتتى شاڭىراقتى ءتۇرلى باعىتقا، تاپقا ءبولىپ العان ادامداردىڭ كوزقاراسىنا ساي كەيىپكەرلەرمەن جازا ءبىلۋى – شەبەرلىك.
شىعارماداعى سۇر كيگەن ادام - سيقىرشى. سيقىرشىنىڭ باستى مىندەتى – ادامدى الداۋ، ارباۋ. سەندىرۋ، سەزىمىنە ەرىك بەرىپ، ەموتسياسىن شىعارۋ. ال ادامنىڭ ىشكى جان دۇنيەسىندەگى تىلسىم كۇشتەردى قوزعاۋ – جىننىڭ ءىس-ارەكەتى. سوندىقتان بولار، سىنشىلار ونى ءازازىل دەپ اتاعانى.
ادامنىڭ ەڭ قىمبات بولىگى – جان جانە مي. ەگەر، ءسىزدىڭ ءالسىز تۇسىڭىز ميىڭىزعا باقىلاۋ جاساپ، جانىڭىزعا يەلىك ەتە الماساڭىز، دەمەك ونى ارباۋ وڭاي دۇنيە. جامان اتاۋلىعا بىردەن جولىعاسىز. ءجا، مي مەن جان بولەك اڭگىمە، كولەڭكە شە؟ كولەڭكە ءبىزدىڭ ەگىزىمىز عوي. ەگىزىڭە يەلىك ەتۋ قولىڭنان كەلمەسە، ونىڭ دا باسقا قۇزىرعا ءوتىپ كەتۋى جەڭىل. شاميسسونىڭ شىعارماسىنداعى باستى كەيىپكەر دە سيقىرعا الدانىپ، كولەڭكەسىن ازازىلگە بەرەدى. بايلىققا كوزى بايلانعان قاراپايىم قالا تۇرعىنى، «تۇرعىن» دەگەن اتاۋعا دا زار بوپ، ءوز ورتاسىنان ءبىرجولاتا الشاقتايدى. كولەڭكەسى جوق ادام بولۋى – قوعامنىڭ ۇرەيىن ۇشىرادى. قالىپتى دۇنيە...
قىسقاشا مازمۇن وسى. ال ءدال وسى شىعارمانىڭ قازاقى ۆەرسياسى شىقسا ونى قالاي وربىتەمىز؟ مىسال كەلتىرەيىك.
سۇر كيگەن ادام – ساقالى ساپسيعان، بالاعى قىسقا، نامازى وزگە، ۇلتى جوق، ديسترۋكتيۆتى اعىمدا اداسىپ جۇرگەن ادام. ونىڭ سيقىرى، ءبىر اۋىز سوزىمەن-اق قاسىنا ون ادامدى بىردەن جيىپ الۋى. ءوز اعىمىنا تارتۋى. ال ۇسىناتىن دۇنيەسى جۇمىسسىز اقشا، ەڭبەكسىز ماشىنە، ساپاسى جوق ساياحات. ساياحاتى – سوعىس. تەك الدانعان ادامدار ونى كەش تۇسىنەدى. وڭاي اقشاعا ۇمتىلعان ادامدار وڭبايدى. ءدىنى، ۇلتى، ءدىلى، ءتىپتى ءوزى دە قۇرتىلىپ كەتەدى. سۇر كيگەن ادام ءبىزدىڭ قوعامدا – ءسالافيت.
پەتەر شلەميل سىندى قاراپايىم ازاماتتاردى قىزىقتىراتىن جۇمىسسىز جەمىس، جەڭىل ءجۇرىس، بىراق قىرۋار اقشا. ازازىلگە الدانىپ، باقىتتى كۇي كەشەم دەۋلەرى ميعا قونبايدى.
بەندەل مەن ميننا ءبىزدىڭ قوعامدا دا كەزدەسەتىنى انىق. ويتكەنى ون ادامنىڭ ىشىندەگى ەكەۋىنىڭ ساناسى بار. ولار ويلانۋ ارقىلى، وڭاي دۇنيە جوق ەكەنىن اڭعارادى دا وزدەرى جونىنە كەتەدى. ولارعا باستىسى ادام بوپ قالۋ. ادامنىڭ كۇيىن كەشۋ.
شىعارما happy end-پەن اياقتالدى. سۇر ادامعا اداسقان ادامدار ءوز جولىن ادامي تۇرعىدا قايتاردى. بىزدە دە سولاي. اداسقاندار ءتۇرلى ەكسترەميستىك وپەراتسيالار ارقىلى ەلگە ورالادى. قاراڭعى قاپاستاعى وتكەن كۇندەرىنەن سۇحبات بەرىپ، وڭ جولعا تۇسكەندەرىن ايتىپ, اقتالىپ الەك. ءجانناتتى ىزدەپ، بايلىققا كەنەلەمىز دەگەندەردىڭ بارلىعى – قارا كۇيە.
PS: مەن وقىعان ءار دۇنيەمنەن قوعامدىق دەرتتى نەمەسە قوعامدىق قۋانىشتى كورىپ، بايلانىستىرعىم كەلەدى. الەمدە اداسۋشىلار مەن ارانداتۋشىلار وتە كوپ. ولاردىڭ ۇسىناتىن دۇنيەسى – اقشا، بايلىق. بۇل جەردە الەۋمەتتىك پروبلەمانىڭ دا بارى ايقىن. تەپە-تەڭدىك جوق قوعامدا ۇنەمى ءتۇزۋ جولدا جۇرەتىن ادامداردىڭ بولا بەرمەيتىنى دە حاق. سۇر ادامدار كوپ، الدانباۋ سانادان!
ءىنجۋ ومىرزاق،
”ادىرنا” ۇلتتىق پورتالى
