اسقار جۇماعاليەۆ تسيفرلىق دامۋ، يننوۆاتسيالار جانە اەروعارىش ءمينيسترى قىزمەتىنەن بوساتىلدى. بۇل تۋرالى اقوردا حابارلادى.
"مەملەكەت باسشىسىنىڭ جارلىعىمەن اسقار قۋانىشۇلى جۇماعاليەۆ قازاقستان رەسپۋبليكاسىنىڭ تسيفرلىق دامۋ، يننوۆاتسيا جانە اەروعارىش ونەركاسىبى ءمينيسترى قىزمەتىنەن بوساتىلدى", - دەلىنگەن حابارلامادا.
اسقار قۋانىشۇلى جۇماعاليەۆ 1972 جىلى رەسەي فەدەراتسياسىنىڭ ورىنبور وبلىسىندا دۇنيەگە كەلگەن.
سۆەردلوۆ سۋۆوروۆ اسكەري ۋچيليششەسىن تامامداعان. راديوبايلانىس، راديوتاراتۋ جانە تەلەديدار ماماندىعى بويىنشا قازاق ۇلتتىق تەحنيكالىق ۋنيۆەرسيتەتىندە وقىدى. قازاق گۋمانيتارلىق-زاڭ ۋنيۆەرسيتەتىندە "قۇقىقتانۋ" ماماندىعى بويىنشا ەكىنشى جوعارى ءبىلىمىن العان.
ورىس، قازاق جانە اعىلشىن تىلدەرىن بىلەدى.
ەڭبەك جولىن 1996 جىلى "جارىق" جشس باس ديرەكتورى قىزمەتىنەن باستادى.
بۇل قىزمەتكە دەيىن "تەلەكوممۋنيكاتسيالىق ترافيك بيللينگى رەسپۋبليكالىق ورتالىعىنىڭ" باسقارما باسشىسى، "قازاقتەلەكوم" اق-نىڭ پرەزيدەنتى، پرەمەر-ءمينيستردىڭ ورىنباسارى – قورعانىس جانە اەروعارىش ونەركاسىبى ءمينيسترى قىزمەتتەرىن اتقاردى.
ەستەرىڭىزگە سالا كەتسەك، بۇل مينيسترلىك تەلەكوممۋنيكاتسيا جانە بايلانىس، ەلەكتروندى ونەركاسىپ، ەلەكتروندى ۇكىمەت جانە مەملەكەتتىك قىزمەتتەر، اەروعارىش ونەركاسىبى، اقپاراتتىق قاۋىپسىزدىك، گەودەزيا جانە كارتوگرافيا سياقتى سالالارىمەن اينالىسادى.
اسقار جۇماعاليەۆ ەل ىشىندە بيلىك باسىندا ۇزاق جىل قىزمەت ەتكەن شەندىلەردىڭ ءبىرى قايرات ءماميدىڭ كۇيەۋ بالاسى رەتىندە تانىمال. قايرات ءمامي 2017 جىلدان بەرى كونستيتۋتسيالىق كەڭستىڭ توراعاسى قىزمەتىن اتقارادى.
جاسۇلان ءناۋرىزالى،
"ادىرنا" ۇلتتىق پورتالى
