تۇركىستان وبلىسىندا پوليتسەيلەر زاڭسىز، ۇستەمە باعامەن ءدارى ساتۋدىڭ 20-عا جۋىق جايتىن انىقتادى. بۇل تۋرالى «ادىرنا» ۇلتتىق پورتالى قازاقستان رەسپۋبليكاسىنىڭ ىشكى ىستەر مينيسترلىگىنە سىلتەمە جاساپ حابارلايدى.
تۇركىستان وبلىسى پوليتسيا دەپارتامەنتىنىڭ قىزمەتكەرلەرىمەن وبلىس كولەمىندە كارانتين ۋاقىتىندا قاجەتتى ءدارى-دارمەكتەردىڭ جەتىسپەۋشىلىگىن پايدالانىپ، سۇرانىسقا يە بولعان دارىلەردى جوعارى باعامەن ساتقان ءدارىحانا قىزمەتكەرلەرى مەن تۇرعىنداردى انىقتاۋ ماقساتىندا رەيدتەر جالعاسىپ جاتىر.
ءىس شارا بارىسىندا ءتارتىپ ساقشىلارى 5-شىلدەدەن باستاپ 19 زاڭسىز جايتتى انىقتاپ تىركەدى، ونىڭ ىشىندە: بەلگىلەنبەگەن ورىندا ءدارى-دارمەك ساتۋ – ءتورت جايت بولسا، ءدارىحانادا قىمبات باعامەن ءدارى-دارمەك ساتۋدىڭ – 15 جايتى انىقتالدى. اقبتك-مەن ەكى جايتقا حاتتاما تولتىرىلدى. تو بويىنشا دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسىمەن قاۋىپسىزدىگىنە باقىلاۋ كوميتەتىنە 17 جايت جولداندى.
وبلىس كولەمىندە تىركەلگەن 19 جايتقا بايلانىستى ايعاقتى زات رەتىندە: 1500-گە جۋىق ءدارى-دارمەكتەر، 4982 –دانا بەتپەردە، 10-دانا قولعاپ الىندى.
اتاپ ايتقاندا، جەتىساي قالاسى ىنتىماق اۋىلى، كورىكتى كوشەسى بويىندا ورنالاسقان “مەرەي” ءدارىحانا ساتۋشىسى 10 دانا “مەديتسينالىق بەتپەردە” باعاسى 100 تەڭگەدەن /بەكىتىلگەن باعا 60-تەڭگە/, بەس دانا “اسكوربين قىشقىلى” 200 تەڭگەدەن /بەكىتىلگەن باعا 60 تەڭگە/, ەكى دانا “رينزا” 600 تەڭگەدەن /بەكىتىلگەن باعا 500 تەڭگە/, “نيمەسيل” 4300 تەڭگەدەن /بەكىتىلگەن باعا 3300/, ەكى دانا “تسيترومون ۋ” 200-تەڭگەدەن /بەكىتىلگەن باعا 60 تەڭگە/, بەس امپۋلا “نوۆوكاين” باعاسى 50 تەڭگەدەن /بەكىتىلگەن باعا 40 تەڭگە/, بەس دانا “تسەفرياكسون” باعاسى 500 تەڭگەدەن /بەكىتىلگەن باعا 300 تەڭگە/ ساتۋ بارىسىندا ۇستالدى.
اتالعان دەرەك جەتىساي اپب-ءنىڭ تىركەلىپ، زاڭدىلىعىن تەكسەرۋ ءۇشىن قازاقستان رەسپۋبليكاسى دەنساۋلىق ساقتاۋ مينيستىرلىگىنىڭ تاۋارلار مەن كورسەتىلەتىن قىزمەتتەردىڭ ساپاسىمەن قاۋىپسىزدىگىنە باقىلاۋ كوميتەتىنىڭ تۇركىستان وبلىسى بويىنشا باسقارماسىنا جولداندى.
ودان بولەك، زەردەلى ەلدى-مەكەنى تۇركەباي كوشەسىندەگى تۇرعىننىڭ ەسىك الدىندا ورنالاسقان ازىق-تۇلىك دۇكەنىندە زاڭسىز ءدارى-دارمەك پرەپاراتتارىن ساتۋ جايتى انىقتالدى. پوليتسەيلەر جەدەل-ىزدەستىرۋ شاراسى بارىسىندا ايعاقتىق زات رەتىندە “نول گريپپ”، “كەتانوۆ”، “تەتراتسيكلين”، “پلاتيمازول”، “ديميدرول”، “مەزيم”، “تايلول حوت” جانە ت.ب ءدارى-دارمەكتەردى الدى.
ال، تولەبي اۋدانى، زاعامبار اۋىلىنىڭ ورتالىق كوشەسىنىڭ بويىندا ورنالاسقان ءدارىحانانىڭ ساتۋشىسى “ازيتروميتسين” 500 مگ، “اسپيرين”، “پاراتسەتومول”، “كسون” ءدارىسى، “دولانا تۇندىرماسى” ءدارىسى، “مەزيم فورتە” دارىلەرىن قىمبات باعامەن ساتۋ بارىسىندا ۇستالدى.
ءدارىحانا ساتۋشىسى ءوز تۇسىنىكتەمەسىندە جەكە باسىنىڭ پايداسى ءۇشىن اتالعان دارىلەرگە ۇستەمە اقشا قوسىپ ساتقانىن جەتكىزدى. بۇل جايت تولەبي اپب-نە تىركەلىپ، زاڭدىلىعىن تەكسەرۋ ءۇشىن ءتيىستى باسقارماعا جولداندى.
