رەسپۋبليكالىق "اقجۇنىس" ەرىكتى انالار قوزعالىسىنىڭ جەتەكشىلەرى قىزىلوردا وبلىسىنىڭ اكىمىنەن جاڭاقورعان اۋدانى ءباسپاسوز حاتشىسى نۇربول باكيروۆتى قىزمەتىنەن الۋىن تالاپ ەتتى. ايتۋلارىنشا، جولدى جابۋدى ۋچاسكەلىك پوليتسيا قىزمەتكەرىنە نۇربول باكيروۆ ءوتىنىش جاساعان.
"قىزىلوردا وبلىسىنىڭ اكىمى ابدىحالىقوۆا گ. ن.
جاڭاقورعان اۋداندىق اكىمشىلىگىندە ءباسپاسوز حاتشىسى بولىپ قىزمەت اتقاراتىن نۇربول باكيروۆتىڭ قىزمەتىنەن كەتۋىن تالاپ ەتەمىز. ءسىزدىڭ جاڭاقورعان اۋدانىنا بارعان ءىس-ساپارىڭىزدا، جولدىڭ جابىلۋىن نۇربول باكيروۆ ءوز موينىنا الىپ، جاڭاقورعان ىشكى ىستەر ورگاندارىنىڭ ۋچاسكەلىك پوليتسيا قىزمەتكەرى شىڭعىسقا (تەگىن انىقتاي المادىق) جول جابۋ تۋرالى ءوتىنىش ايتقانى بەلگىلى بولعان. جاڭاقورعان كەنتىنىڭ تۇرعىنى، اقجۇنىس بەلسەندىسى - ساندۋعاش تۇرلىبەكوۆانىڭ تىكەلەي ەفيرىنەن كەيىن ءارتۇرلى فەيك اككاۋنتتاردان ساندۋگاش تۇرلىبەكوۆانىڭ جەكە باس مۇددەسىن قورلايتىن ۆيدەو، پۋبليكاتسيالار جاريالاندى.
نۇربول باكيروۆتىڭ ءوز قىزمەتىن اسىرا پايدالانعانى، ونىڭ ەرەجەگە ساي ەمەس ءىس-ارەكەتتەرى قىزىلوردا وبلىسىنىڭ اكىمى - ءسىزدىڭ جانە جاڭاقورعان اۋدانى اكىمدىگىنىڭ مەملەكەتتىك مۇددەلەرىنە كىر كەلتىردى دەپ ەسەپتەيمىز.
بۇل ماسەلەدە وبل.اكىمىنىڭ "قاۋىپسىزدىگىن قامتاماسىز ەتۋ" ماقساتىندا جولدى جاپقاندارىن اۋدان اكىمىنىڭ سۇحباتى دا باق-تا، الەۋمەتتىك جەلىلەردە جاريالاندى. وسى ورايدا اۋدان اكىمى دە جاۋاپقا تارتىلۋى ءتيىس دەپ ەسەپتەيمىز.
جوعارعى جازىلعانداردى ەسكەرە وتىرىپ، جاڭاقورعان اۋدانىنىڭ اكىمشىلىك ءباسپاسوز حاتشىسى نۋربول باكيروۆتى قىزمەتىنەن بوساتۋدى تالاپ ەتەمىز.
قۇرمەتپەن، رەسپۋبليكالىق "اقجۇنىس" ەرىكتى انالار قوزعالىسىنىڭ جەتەكشىلەرى:
ساۋلە ابىلداحانقىزى
جانات ەستاەۆا
جۇلدىز اقتانجانوۆا
ايمان باتىربەكوۆا
ماقپال ابىشەۆا
ءلاززات كوجاحمەت
نەسىبەلى حايرۋللاەۆا
گۋلزيرا ماناباەبا
گاليا جۋسۋپوۆا
گۇلشات راسۋل
گۋلجامال بەرشيمبەكوۆا
سالامات جۋماناليەۆا
انار ساتاي
ساندۋعاش تۇرلىبەكوۆا", - دەلىنەدى فەيسبۋك جازباسىندا.
ەسكە سالا كەتەيىك، جاڭاقورعان اۋدانىنىڭ تۇرعىنى ساندۋعاش تۇرلىبەكوۆا قىزىلوردا وبلىسىنىڭ اكىمى كەلەدى دەپ جولدى جاۋىپ تاستاعانىن ايتىپ، ۆيدەو جاريالاپ، اكىمنىڭ وزىنە دە داتىن ايتقان ەدى.
ال گۇلشارا ابدىحالىقوۆا وعان جولدى جاپتىرماعانىن ايتتى. باسپاسوزگە رەسمي سۇحبات بەردى.
"مەن جولدى جابۋ تۋرالى تاپسىرما بەرگەن جوقپىن، اۋدان اكىمى دە ەشقانداي تاپسىرما بەرمەدى. سول جەردەگى ىشكى ىستەر ءبولىمىنىڭ باسشىسى دا ونداي تاپسىرما بەرىلمەگەنىن ايتىپ وتىر. بۇل ۋچاسكەلىك پوليتسيانىڭ شەشىمى بولسا، ونىڭ ءىس-ارەكەتىنە قاتىستى وبلىستىق دەپارتامەنت باسشىسى سۇلتان بەكتورەگە تاپسىرما بەردىم،" - دەدى.
