نۇر-سۇلتان، BAQ.KZ ءتىلشىسى. بۇل تۋرالى قر دەنساۋلىق ساقتاۋ ءمينيسترى الەكسەي تسوي قر پرەزيدەنتى جانىنداعى ورتالىق كوممۋنيكاتسيالار قىزمەتى الاڭىندا "قر كۆي بويىنشا ستاتيستيكالىق دەرەكتەر جانە ەسەپكە الۋدىڭ جاڭا تاسىلدەرى" تاقىرىبى اياسىندا وتكەن ونلاين بريفينگ كەزىندە ايتتى.
بۇگىندە COVID-19 ينفەكتسياسىمەن سىرقاتتانۋ بويىنشا تاۋلىگىنە 1700-1800 ادامنان ۆيرۋس انىقتالىپ وتىر. بۇل تۇراقتى جاعداي. وسى تۇرعىدا مەملەكەت باسشىسى كوروناۆيرۋس ينفەكتسياسىنىڭ ستاتيستيكاسىن رەتكە كەلتىرۋگە قاتىستى تاپسىرما بەردى. كوروناۆيرۋس جاعدايلارىنىڭ جالپى الىنعان ستاتيستيكالىق ەسەبىنەن بولەك، پنەۆمونياعا دا نازار اۋدارۋ كەرەك. وسىعان بايلانىستى، COVID-19 بەن پنەۆمونياعا قاتىستى مالىمەتتەردىڭ بارىنشا اشىق بولۋى ءۇشىن قر دەنساۋلىق ساقتاۋ مينيسترلىگى ستاتيستيكالىق مالىمەتتەر ەسەبىن تاراتۋدا جاڭا ادىستەردى بەلگىلەدى. دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) ەۋروپالىق وڭىرلىك بيۋروسىمەن جۇرگىزىلگەن تەحنيكالىق كونسۋلتاتسيالاردى ەسكەرە وتىرىپ، ءبىز اۋرۋلاردىڭ حالىقارالىق كلاسسيفيكاتسياسىنىڭ جاڭا كودتارى بويىنشا COVID-19 جاعدايلارىن كودتاۋعا جانە ەسەپكە الۋعا كوشۋ تۋرالى شەشىم قابىلدادىق. وسىلايشا، COVID-19-دىڭ زەرتحانالىق راستالعان جاعدايلارى پتر تەستى تەرىس ناتيجە كورسەتكەن، بىراق COVID-19-دىڭ كلينيكالىق جانە ەپيدەميولوگيالىق بەلگىلەرى بار پنەۆمونيا جاعدايلارىمەن بىرىكتىرىلەدى. جيناقتالعان كلينيكالىق تاجىريبەلەردەن ءبىز وسى اۋرۋلار اعىمىنىڭ ۇقساستىعىن جانە ولاردى ەمدەۋ تاكتيكاسىنا بىرىڭعاي تاسىلدەردى قولدانۋ قاجەتتىگىن اتاپ وتكىمىز كەلەدى، - دەدى ول.
مينيستر ددسۇ COVID-19 جاعدايلارىن جاڭا فورماتتا جىكتەۋ جانە ەسەپكە الۋ جونىندە رەسمي حابارلاما جىبەرگەنىن ايتتى.
اعىمداعى جىلدىڭ 11 شىلدەسىندە دەنساۋلىق ساقتاۋ مينيسترلىگى ددسۇ-نان COVID-19 جاعدايلارىن جاڭا فورماتتا جىكتەۋ جانە ەسەپكە الۋ جونىندەگى رەسمي حابارلاما العان بولاتىن. قازىرگى ۋاقىتقا دەيىن قازاقستاندا باسقا دا ەلدەردەگىدەي، COVID-19 زەرتحانالىق راستالعان جاعدايلاردى عانا ەسەپكە الۋ جۇزەگە اسىرىلدى. سونىمەن قاتار، ماۋسىم ايىنىڭ ءۇشىنشى ونكۇندىگىندە قوزدىرعىشى ناقتىلانباعان، ياعني زەرتحانالىق راستالماعان ۆيرۋستىق پنەۆمونيانىڭ ءوسۋى بايقالدى. COVID-19 ينفەكتسياسىنىڭ سىرقاتتانۋشىلىق پەن ءولىم-ءجىتىم ستاتيستيكاسى ەكى دەرەك كوزىنەن قۇرالاتىن بولادى: زەرتحانالىق راستالعان COVID-19 جاعدايلارى جانە انىقتالماعان ۆيرۋستىق پنەۆمونيالار، - دەدى تسوي.
الەكسەي تسوي اۋرۋلاردىڭ حالىقارالىق جىكتەمەسىنىڭ جاڭا كودتارىن پايدالانا وتىرىپ، COVID-19 ينفەكتسياسىن كودتاۋعا تولىق كوشۋ 2020 جىلدىڭ 1 تامىزىنان باستاپ جۇزەگە اسىرىلاتىنىن جەتكىزدى.
ول ءۇشىن COVID-19 كودتاۋ باعىتىندا مەديتسينا قىزمەتكەرلەرىنىڭ قۇزىرەتىن ارتتىرۋ، اقپاراتتىق جۇيەلەردى رەتكە كەلتىرۋ جانە باسقا دا تەحنيكالىق ماسەلەلەردى شەشۋ جونىندە شارالار قابىلداۋ قاجەت. وسى ورايدا، دەنساۋلىق ساقتاۋ مينيسترلىگى ەسەپكە الۋ تاسىلدەرىنىڭ وزگەرۋى كوروناۆيرۋستىق ينفەكتسيادان بولعان سىرقاتتانۋشىلىق پەن ءولىم-ءجىتىم دەڭگەيى تىركەلەتىن حالىقارالىق رەيتينگتە قازاقستاننىڭ ۇستانىمى ناشارلايتىنىن تولىق تۇسىنەدى. سونىمەن قاتار، بۇل ءتاسىل اۋرۋدىڭ دۇرىس بولجامىن جاساۋعا، قاجەتتى رەسۋرستاردى، ياعني، مەديتسينالىق كادرلاردى، توسەك-ورىنداردى، مەديتسينالىق جابدىقتاردى، دارىلىك زاتتاردى ءتيىمدى جوسپارلاۋعا، سونداي-اق، ستاتيستيكانىڭ اشىقتىعىن قامتاماسىز ەتۋگە مۇمكىندىك بەرەدى، - دەدى مينيستر.
ايسۇلۋ مامانقىزى
فوتو: اشىق دەرەككوز
