ەلوردا كۇنىن دە اتاپ وتتىك. ەلدەگى پاندەميا جاعدايىنا قاراماستان ايتۋلى مەرەكەنى جىلداعىداي دۇرىلدەتىپ وتكىزدىك. وعان دالەل نۇر-سۇلتان قالاسىندا بوي كوتەرگەن ەلباسىنىڭ ەسكەرتكىشى. ءبىر تاۋلىكتىڭ ىشىندە بۇل شاراعا حالىق ءوز نارازىلىعىن ءبىلدىرىپ تە ۇلگەردى. پوست تا جازىلدى، ولەڭ دە ارنالدى.
بىرەۋگە ۇنار، بىرەۋگە ۇناماس. تاعى ءبىر جاڭالىقپەن بولىسۋگە اسىقپىز ياكي ء“ماجبۇرمىز”. «استانا» حالىقارالىق قارجى ورتالىعى (احقو) نۇرسۇلتان نازارباەۆ قورىمەن بىرلەسىپ قازاقستان رەسپۋبليكاسىنىڭ تۇڭعىش پرەزيدەنتى ن.ءا. نازارباەۆتىڭ مەرەيتويىنا وراي «زاماناۋي قازاقستاندىق مەملەكەتتىلىكتىڭ قالىپتاسۋى مەن دامۋى (العاشقى قولدان)» كىتابىنىڭ اعىلشىن تىلىندەگى نۇسقاسىن تانىستىردى، دەپ حابارلايدى قازاقپارات.
كىتاپتا قازاقستان رەسپۋبليكاسى تۇڭعىش پرەزيدەنتى – ەلباسىنىڭ ەگەمەن قازاقستاننىڭ زاماناۋي مەملەكەتتىلىگىن بەكىتۋ مەن نىعايتۋداعى ءرولى اشىلعان. باسىلىمدا ەلباسىنىڭ باسشىلىعىمەن ەلدىڭ قالىپتاسۋ جانە دامۋ پروتسەسى، مەملەكەتتىك باسقارۋ ينستيتۋتتارىن قۇرۋ مەن جاڭعىرتۋ كەزەڭدەرى ايتىلعان. قازاقستان رەسپۋبليكاسى كونستيتۋتسياسى نەگىزىندە قازاقستاندىق قوعامنىڭ جاڭعىرتىلۋى جان-جاقتى قامتىلعان.
كىتاپتىڭ ونلاين تانىستىرىلىمى سالتاناتىنا قر جوعارعى سوتىنىڭ توراعاسى ج.اسانوۆ، قر ادىلەت ءمينيسترى م.بەكەتاەۆ، قر كونستيتۋتسيالىق كەڭەس مۇشەسى ءۇ.شاپاق، احقو باسقارۋشىسى ق.كەلىمبەتوۆ جانە نۇرسۇلتان نازارباەۆ قورى اتقارۋشى ديرەكتورىنىڭ ورىنباسارى ي.روگوۆ قاتىستى.
كىتاپتىڭ ەرەكشەلىگى – ونى قۇراستىرۋعا ەلباسى نۇرسۇلتان نازارباەۆتىڭ باستاماسىمەن جاسالعان رەفورمالار مەن وزگەرىستەرگە تىكەلەي قاتىسقان مەملەكەتتىك جانە قوعام قايراتكەرلەرى اتسالىستى.
شاراعا ودان بولەك لاتۆيا كونستيتۋتسيالىق سوتىنىڭ توراعاسى ي. زيەمەلە، احقو حتو توراعاسى ب.دومانن، احقو اكادەميالىق كەڭەسىنىڭ مۇشەسى ءابدىرايىموۆ ب.ج. جانە عىلىم اكادەمياسىنىڭ ءتىلتانۋ ماماندىعى بويىنشا اكادەميگى ش.قۇرمانبايۇلى قاتىستى.
ەكونوميكالىق احۋال اقساپ تۇرعان كەزەڭدە مۇنداي مادەني شارالاردى جۇرگىزۋ اقتالا ما؟ ەلدەگى كريزيستىك جاعدايدا مەملەكەت تاراپىنان كىتاپ باسىپ شىعارۋ ءىسى ءتيىمدى بولا ما، جوق پا، ول جاعىن باعامداۋدى وقىرماننىڭ ءوز ەركىنە قالدىردىق. بالكىم، پاندەميا دەپ الداعى جوسپارلاردى ىعىستىرعان دا دۇرىس ەمەس شىعار؟ باستىسى، بيلىكتىڭ دە، حالىقتىڭ دا كوزى تۋرا بولعاي!
اياۋلىم ءاءبىلدا،
«ادىرنا» ۇلتتىق پورتالى.
