ادىلەت احمەتۇلى. ابىز انامەن قوشتاسۋ

518

ارعى الەمگە اتتاندى ءبىر ۇلى ادام،
نۇكتەسىن قويدى بۇگىن ۇلى رومان.
التىن جانى جارالعان ىزگىلىكتەن،
اسىل رۋحى جارالعان شۇعىلادان.

رابيعا – دانامىز، انامىز عوي،
داڭعىل جول سالىپ كەتكەن دارا ابىز عوي.
الاشتىڭ ارىستارىن ايتىپ ءجۇرىپ،
اقىمەتتى اقتاعان قارا قىز عوي.

قازاقتىڭ انا – ءتىلى، ءتىل – اناسى،
تەكتى ولكەنىڭ تەڭدەسسىز عۇلاماسى.
قازاسىن كوتەرە الماي قارت ابىزدىڭ،
قايعىنىڭ ءنىلىن جۇتىپ تۇر الاشى.

تۇلعاسى توتىقۇستاي تورعىن ەدى،
كوڭىلى تاۋ سۋىنداي ءمولدىر ەدى.
قازاقتىڭ ءتىلى ءۇشىن شىرىلدادى،
بويىنان ۇزىلگەنشە سوڭعى دەمى.

رۋحى شىن عالىمنىڭ كوككە ورلەدى،
جىلايدى وسكەن جەردىڭ بوكتەر، بەلى.
تاڭدايىنا قىشقىلداۋ ءتيدى ابىزدىڭ،
تەتەلەس قوس عاسىردىڭ كوپ كەرمەگى.

ءبىر باسىندا دانىشپان كورەگەندىك،
تۇلعاسىندا تازالىق، ەرەن ەرلىك.
انالاردىڭ ارقاسى ەمەس پە ەدى،
انا تىلگە اپەرگەن ەگەمەندىك.

مىنەزى ايعاعى ەدى تۋرالىقتىڭ،
ايباتى بەينەسىندەي شۋدا بۇلتتىڭ.
قىزى بولىپ تۋسا دا ءبىر حالىقتىڭ،
اناسى بوپ اتتاندى تۋعان ۇلتتىڭ.

جىراۋلاردىڭ جىرىنداي ەكپىندى ەدى،
ماحامبەتتىڭ جۇزىندەي كەسكىندى ەدى.
جەرىنە سايا بولار ەمەن ەدى،
ەلىنە ەڭبەك ەتتى ەس بىلگەلى.

بالا كۇنىن ايتاتىن ويىلداعى،
سۋ توگىلمەس جورعاداي وي ىرعاعى.
ادىلدىكپەن عىلىمعا كىرگەن جاندى،
عالىم بىتكەن تالاسسىز مويىندادى.

اتتاندى توقسان بەس جىل تويىن كورىپ،
قۇداي دا قۇرمەت قىلعان زەيىن بەرىپ.
رۋحىڭىز تۋعان ەلگە قاراپ تۇرار،
بەيىشتىڭ قاق تورىنەن مەيىرلەنىپ!

ادىلەت احمەتۇلى، اقىن،

ا. بايتۇرسىنۇلى اتىنداعى ءتىل ءبىلىمى ينستيتۋتى گرامماتيكا ءبولىمىنىڭ قىزمەتكەرى

پىكىرلەر
رەداكتسيا تاڭداۋى