Arǵy álemge attandy bir uly adam,
Núktesin qoıdy búgin uly roman.
Altyn jany jaralǵan izgilikten,
Asyl rýhy jaralǵan shuǵyladan.
Rabıǵa – danamyz, anamyz ǵoı,
Dańǵyl jol salyp ketken dara abyz ǵoı.
Alashtyń arystaryn aıtyp júrip,
Aqymetti aqtaǵan qara qyz ǵoı.
Qazaqtyń Ana – Tili, Til – Anasy,
Tekti ólkeniń teńdessiz ǵulamasy.
Qazasyn kótere almaı qart abyzdyń,
Qaıǵynyń nilin jutyp tur Alashy.
Tulǵasy totyqustaı torǵyn edi,
Kóńili taý sýyndaı móldir edi.
Qazaqtyń tili úshin shyryldady,
Boıynan úzilgenshe sońǵy demi.
Rýhy shyn ǵalymnyń kókke órledi,
Jylaıdy ósken jerdiń bókter, beli.
Tańdaıyna qyshqyldaý tıdi abyzdyń,
Teteles qos ǵasyrdyń kóp kermegi.
Bir basynda danyshpan kóregendik,
Tulǵasynda tazalyq, eren erlik.
Analardyń arqasy emes pe edi,
Ana tilge ápergen Egemendik.
Minezi aıǵaǵy edi týralyqtyń,
Aıbaty beınesindeı shýda bulttyń.
Qyzy bolyp týsa da bir halyqtyń,
Anasy bop attandy týǵan ulttyń.
Jyraýlardyń jyryndaı ekpindi edi,
Mahambettiń júzindeı keskindi edi.
Jerine saıa bolar emen edi,
Eline eńbek etti es bilgeli.
Bala kúnin aıtatyn Oıyldaǵy,
Sý tógilmes jorǵadaı oı yrǵaǵy.
Ádildikpen ǵylymǵa kirgen jandy,
Ǵalym bitken talassyz moıyndady.
Attandy toqsan bes jyl toıyn kórip,
Qudaı da qurmet qylǵan zeıin berip.
Rýhyńyz týǵan elge qarap turar,
Beıishtiń qaq tórinen meıirlenip!
Ádilet Ahmetuly, aqyn,
A. Baıtursynuly atyndaǵy Til bilimi ınstıtýty Grammatıka bóliminiń qyzmetkeri
