وسى كۇنگە دەيىن ەكس-پرەزيدەنت ن.نازارباەۆتىڭ تۋعان كۇنى “تازا سايكەستىكپەن” استانانىڭ تۋعان كۇنىمەن بىرگە جالپىۇلتتىق دەڭگەيدە تويلانىپ كەلدى. مەملەكەتتىك بيۋدجەتتەن قانشاما ميللياردتار كەتتى. تۋعان كۇندى تويلاۋعا كەتەتىن شىعىننىڭ كولەمى جىل ساناپ ءوستى.
ماسەلەن، 2014 جىلى استانا اكىمدىگى تۋعان كۇنگە 700 ملن تەڭگە جۇمساسا، 2018 جىلى قالانىڭ 20 جىلدىعىنا مەملەكەتتىك بيۋدجەتتەن 19 ملرد تەڭگە كەتتى. ودان بولەك وبلىس پەن قالا اكىمدەرى جەكە-جەكە ن.نازارباەۆتىڭ تاپسىرماسىمەن تۋعان كۇنگە قۇنى بىرنەشە ءجۇز ميلليون تەڭگەدەن باستاپ 1,5 ملرد تەڭگەگە دەيىن جەتەتىن سىيلىق تارتۋ ەتتى. بىلتىر 20 ناۋرىزدا ق.توقاەۆ قالانىڭ اتىن وزگەرتۋدى ۇسىنىپ، بۇكىل ”ەليتانىڭ” الدىن وراپ، 6 شىلدەگە باستىعىنا ەستەن كەتپەس سىيلىق جاسادى.
بيىلعى 80 جىلدىق يۋبيلەيگە نۇرسۇلتاندىق شەنەۋنىكتەر بىلتىردان بەرى دايىندالسا، ەش تاڭ قالمايمىن. بىراق اقىلعا سالساق، ولاردىڭ جوسپارىنا كوروناۆيرۋس اسەر ەتۋى ءتيىس ەدى. “ەليتانىڭ” بويىندا تامشىداي بولسا ادامگەرشىلىك بولسا، كۇن سايىن قازاقستاندىقتار سول “ەليتانىڭ” ساياساتىنداعى ولقىلىق پەن سالاقتىقتان كوز جۇمىپ جاتقان كەزدە پاندەميادا پير جاساۋدان باس تارتار ەدى. وكىنىشكە قاراي، ولاردىڭ تۋعان كۇندە پاتيلاتۋ جوسپارى قاتتى وزگەرە قويمادى.
مەنىڭ ويىمشا، “ەليتانىڭ” وسىنداي مارازمگە جول بەرۋىنە ەكى سەبەپ بار. ءبىرىنشى سەبەپ — اۋلەتتىڭ وكىلدەرى، ن.نازارباەۆتىڭ ەڭ جاقىن شەنەۋنىكتەرى مەن وليگارحتارى، ساياسي سالماعى بار اتقامىنەرلەر پاندەمياعا قاراماي ءالى كۇنگە دەيىن پاراللەل الەمدە ءومىر ءسۇرىپ جاتىر. جىل سايىن تۋعان كۇندى دۋمانداتىپ تويلاۋعا ۇيرەنىپ قالعان ولار بيىل دا پاتيلاتۋعا دايىن وتىرعان سياقتى. ماسەلەن، اليا نازارباەۆا ينستاگرامدا پاپاسىنىڭ تۋعان كۇنىن بۇگىننەن باستاپ تويلاۋعا كىرىسىپ كەتتى.
ەكىنشى سەبەپ — تۋعان كۇندى جىل سايىن ۇيىمداستىرۋ كەيبىر پىسىقايلارعا ساياسي ۇپاي جيناۋمەن قاتار مەمبيۋدجەت ەسەبىنەن بىرنەشە ميلليارد “بيزنەس” جاسايتىن مۇمكىندىك سىيلايدى. ولاردىڭ بيزنەس جوسپارىنىڭ قاسىندا ازاماتتاردىڭ ءومىرىنىڭ قۇنى كوك تيىن.
ادەتتەگىدەي It’s Personal and It’s Business.
شالقار نۇرسەيىتوۆتىڭ جەلىدەگى جازباسىنان
