Osy kúnge deıin eks-prezıdent N.Nazarbaevtyń týǵan kúni “taza sáıkestikpen” Astananyń týǵan kúnimen birge jalpyulttyq deńgeıde toılanyp keldi. Memlekettik bıýdjetten qanshama mıllıardtar ketti. Týǵan kúndi toılaýǵa ketetin shyǵynnyń kólemi jyl sanap ósti.
Máselen, 2014 jyly Astana ákimdigi týǵan kúnge 700 mln teńge jumsasa, 2018 jyly qalanyń 20 jyldyǵyna memlekettik bıýdjetten 19 mlrd teńge ketti. Odan bólek oblys pen qala ákimderi jeke-jeke N.Nazarbaevtyń tapsyrmasymen týǵan kúnge quny birneshe júz mıllıon teńgeden bastap 1,5 mlrd teńgege deıin jetetin syılyq tartý etti. Byltyr 20 naýryzda Q.Toqaev qalanyń atyn ózgertýdi usynyp, búkil ”elıtanyń” aldyn orap, 6 shildege bastyǵyna esten ketpes syılyq jasady.
Bıylǵy 80 jyldyq ıýbıleıge nursultandyq sheneýnikter byltyrdan beri daıyndalsa, esh tań qalmaımyn. Biraq aqylǵa salsaq, olardyń josparyna koronavırýs áser etýi tıis edi. “Elıtanyń” boıynda tamshydaı bolsa adamgershilik bolsa, kún saıyn qazaqstandyqtar sol “elıtanyń” saıasatyndaǵy olqylyq pen salaqtyqtan kóz jumyp jatqan kezde pandemııada pır jasaýdan bas tartar edi. Ókinishke qaraı, olardyń týǵan kúnde patılatý jospary qatty ózgere qoımady.
Meniń oıymsha, “elıtanyń” osyndaı marazmge jol berýine eki sebep bar. Birinshi sebep — áýlettiń ókilderi, N.Nazarbaevtyń eń jaqyn sheneýnikteri men olıgarhtary, saıası salmaǵy bar atqaminerler pandemııaǵa qaramaı áli kúnge deıin parallel álemde ómir súrip jatyr. Jyl saıyn týǵan kúndi dýmandatyp toılaýǵa úırenip qalǵan olar bıyl da patılatýǵa daıyn otyrǵan sııaqty. Máselen, Alııa Nazarbaeva Instagramda papasynyń týǵan kúnin búginnen bastap toılaýǵa kirisip ketti.
Ekinshi sebep — týǵan kúndi jyl saıyn uıymdastyrý keıbir pysyqaılarǵa saıası upaı jınaýmen qatar membıýdjet esebinen birneshe mıllıard “bıznes” jasaıtyn múmkindik syılaıdy. Olardyń bıznes josparynyń qasynda azamattardyń ómiriniń quny kók tıyn.
Ádettegideı It’s Personal and It’s Business.
Shalqar Nurseıitovtyń jelidegi jazbasynan
