اقش كونگرەسىنىڭ 12 سەناتورى قازاقستان پرەزيدەنتى قاسىم-جومارت توقاەۆقا حات جازىپ، ء"سوز ەركىندىگى مەن جينالۋ ەركىندىگىنە قۇقىعىن پايدالانعانى ءۇشىن" سوتتالعان بەلسەندىلەر مەن ادام قۇقىعىن قورعاۋشىلاردى دەرەۋ تۇرمەدەن بوساتۋدى سۇرادى. بۇل تۋرالى "ادىرنا" Centralasia.org پورتالىنا سىلتەمە جاساپ حابارلايدى.
سەناتورلار حاتىندا ازاماتتىق بەلسەندىلەر ماكس بوقاەۆ پەن اسەت ابىشەۆتى اتاپ كورسەتكەن.
"ادامدار بەيبىت جينالۋ، توپتارعا بىرىگۋ، وي-پىكىرىن ءبىلدىرۋ ەركىندىگىنە قۇقىعىن پايدالانعانى ءۇشىن ەشقاشان سوتتالماۋى ءتيىس. ءبىز ءسىزدى وسىنداي زاڭدى ارەكەتتەرى ءۇشىن سوتتالعان ازاماتتارىڭىزدى بوساتۋعا شاقىرامىز" دەپ باستالعان سەناتورلار حاتى.
اقش زاڭ شىعارۋشىلارى اتالعان ازاماتتاردى COVID-19 پاندەمياسىنا بايلانىستى دەرەۋ شىعارۋ كەرەك دەپ سانايدى. ولاردىڭ سوزىنشە، تۇرمەدە ۆيرۋستى جۇقتىرۋ قاۋپى جوعارى، ال جازاسىن وتەۋشىلەردى ەرتەرەك شىعارۋ كوروناۆيرۋستىڭ تاراۋىن توقتاتۋعا كومەكتەسەدى.
اتىراۋلىق بەلسەندى ماكس بوقاەۆ 2016 جىلعى جەر ميتينگىسىنە قاتىسقاننان كەيىن بيلىك ونى "الەۋمەتتىك ارازدىق تۋدىردى", "جالعان اقپارات تاراتتى" جانە "ميتينگ وتكىزۋ زاڭدارىن بۇزدى" دەگەن ايىپپەن بەس جىلعا سوتتاعان.
الماتى تۇرعىنى اسەت ابىشەۆ قازاقستاندا سوت شەشىمىمەن تىيىم سالىنعان "قازاقستاننىڭ دەموكراتيالىق تاڭداۋى" (قدت) قوزعالىسىنا قاتىسى بار دەگەن ايىپ بويىنشا 2018 جىلى ءتورت جىلعا سوتتالعان. 2019 جىلى 13 اقپاندا اپەللياتسيا سوتى ۇكىمدى وزگەرىسسىز قالدىرعان. بۇرىنعى بانكير، قۋعىنداعى وپپوزيتسيالىق ساياساتكەر مۇحتار ءابليازوۆ جەتەكشىلىك ەتەتىن قدت-نى قازاقستان سوتى "ەكسترەميستىك ۇيىم" دەپ تانىعان. ەۋروپارلامەنت 2019 جىلعى رەزوليۋتسياسىندا بۇل ۇيىمدى "بەيبىت وپپوزيتسيالىق قوزعالىس" دەپ اتاعان. قۇقىق قورعاۋشىلاردىڭ ساراپشىلار كەڭەسى بىلتىر اسەت ابىشەۆتى قازاقستاننىڭ ساياسي تۇتقىندار تىزىمىنە قوسقان.
پرەزيدەنت توقاەۆقا اقش سەناتورى دەموكرات بوب مەنەندەس جازعان حاتقا رەسپۋبليكاشىل سەناتورلار ميت رومني مەن توم تيلليس جانە دەموكرات سەناتورلار ديك دۋربين، ريچارد بلۋمەنتال، رودجەر ۋيكەر، بوب كەيسي، كيرستەن دجيلليبراند، شەررود براۋن، پاتريك لەحي، بەن كاردين جانە كريس ۆان حوللەن قول قويعان.
ءدال وسىنداي حات ورتالىق ازيانىڭ وزگە ءۇش ەلى – تۇركىمەنستان، وزبەكستان مەن تاجىكستان پرەزيدەنتتەرىنە جىبەرىلگەن.
