يران جوعارى ۇلتتىق قاۋىپسىزدىك كەڭەسىنىڭ حاتشىسى ءالي ءلاريدجانيدىڭ قازا بولۋىنا بايلانىستى يزرايلگە قارسى زىمىران سوققىلارىنىڭ جاڭا تولقىنى باستالعانىن جەتكىزدى. بۇل تۋرالى 18 ناۋرىزدا IRNA جازدى، دەپ حابارلايدى «ادىرنا» ءتىلشىسى.
اگەنتتىك مالىمەتىنشە، يسلام رەۆوليۋتسياسى ساقشىلار كورپۋسى (كسير) تەل-اۆيۆ قالاسىنا جاسالعان شابۋىل تۋرالى مالىمدەمە جاساعان.
«قاتىگەز يزرايلدىك رەجيمنىڭ زۇلىمدىق ورتالىعى سانالاتىن تەل-اۆيۆكە “شىنايى ۋادە — 4” وپەراتسياسىنىڭ 61-ءشى تولقىنى اياسىندا “حوررەمشەحر-4”، “كادر”، “يماد” جانە “حايبار-شكان” سياقتى كوپ زاريادتى زىمىراندارمەن سوققى جاسالدى. بۇل — ءشاھيد دوكتور ءالي لاريدجاني مەن ونىڭ سەرىكتەرىنىڭ مەرت بولۋىنا بايلانىستى جاسالعان كەك»، — دەلىنگەن حابارلامادا.
سونداي-اق بۇل شابۋىلدان كەيىن تەل-ءاۆيۆتىڭ كەيبىر بولىكتەرىندە ەلەكتر جارىعى ءوشىپ، جاعدايدى باقىلاۋ مەن ىشكى كۇشتەردىڭ كومەك كورسەتۋى قيىنداعانى حابارلاندى.
ەسكە سالساق، ءالي لاريدجاني تەگەراندا قازا تاپقان ەدى. يران پرەزيدەنتى ماسۋد پەزەشكيان ءلاريدجانيدىڭ ءولىمى ءۇشىن قاتاڭ كەك الاتىنىن مالىمدەپ، ونىڭ قازاسىنا بايلانىستى كوڭىل ايتقان.
