كولىك اپاتى 33,3 پايىزعا ازايدى

2851
Adyrna.kz Telegram

ەلىمىزدى ىندەت جايلاعالى بەرى، اسىرەسە العاشقى ەكى ايدا وقشاۋلانىپ ۇيدە وتىرعانىمىز بار. بىراق ودان جاعداي جاقسارا قويعان جوق. توتەنشە جاعدايدىڭ ۋاقىتى بىتكەنمەن، كارانتين ءالى دە كۇشىندە.

دەگەنمەن، ىندەتتى ءوزىمىز ءورشىتىپ الدىق. قازىر دە اۋرۋحانالار ادامعا لىق تولى. ءتىپتى كەيبىر وڭىرلەر ناۋقاستاردى قابىلداماي جاتىر. كوروناۆيرۋستەن ۇيدە ەمدەلىپ جاتقاندار بار. لايىم ولار تەزىرەك ساۋىعىپ كەتسىن دەيىك، بىراق كارانتيننىڭ پايداسى بولعانىن دا ايتا كەتەيىك.

ول ەڭ الدىمەن جول-كولىك وقيعاسىنا تىكەلەي بايلانىستى. ۇلتتىق ەكونوميكا مينيسترلىگى ستاتيستيكا كوميتەتىنىڭ دەرەگىنە  جۇگىنسەك، سوڭعى بەس ايدا جول-كولىك اپاتى كۇرت تومەندەگەن كورىنەدى. ىشىمدىك ءىشىپ، كولىك ايداعان 741 جۇرگىزۋشى ۇستالعان. بۇل 2019 جىلدىڭ وسى مەرزىمىمەن سالىستىرعاندا كولىك اپاتى وقيعاسىنىڭ 33,3 پايىزعا ازايعانىن كورسەتەدى.  بۇل رەتتە ماماندار كوروناۆيرۋس پەن كارانتيننىڭ اسەرى  بولعانىن دا جاسىرمايدى. ويتكەنى ادامدار ەشقايدا شىقپاي، ۇيدە وقشاۋلاندى، جۇرگىزۋشىلەر كولىككە كوپ وتىرعان جوق. وسىنىڭ ءبارى دە ءوز اسەرىن تيگىزگەن بولۋى كەرەك.

دەسەك تە، اكىمشىلىك جازاعا تارتىلعان  741 ازاماتتىڭ  658-ءى ىشىمدىك ءىشىپ، ەسىرتكى قولدانعانى ءۇشىن جۇرگىزۋشى كۋالىگىنەن ايرىلعان. ال قالعاندارىنا ءارتۇرلى دەڭگەيدەگى جازالار قولدانىلعان.

بۇل جاعدايدى ايماقتىق دەڭگەيدە قاراستىراتىن بولساق، ىشىمدىككە تويىپ الىپ، رۋلگە وتىراتىنداردىڭ  كوش باسىندا باتىس قازاقستان وبلىسى (87 ادام) تۇر. ودان كەيىن قوستاناي وبلىسى - 75 ادام، ماڭقىستاۋ وبلىسى -63 ادام.

ەسكەرتە كەتەيىك، مەملەكەت باسشىسى قاسىم-جومارت توقاەۆتىڭ تاپسىرماسىمەن جىل باسىنان بەرى ىشىمدىك ءىشىپ، رۋلگە وتىراتىن  جۇرگىزۋشىلەرگە قاتىستى تالاپ  قاتايتىلدى. سوندىقتان زاڭنىڭ قاتاڭدىعى دا جاۋاپكەرشىلىكتى ارتتىرىپ وتىر.

 

ەركىن قالدان، «ادىرنا» ۇلتتىق پورتالى

 

 

پىكىرلەر