Elimizdi indet jaılaǵaly beri, ásirese alǵashqy eki aıda oqshaýlanyp úıde otyrǵanymyz bar. Biraq odan jaǵdaı jaqsara qoıǵan joq. Tótenshe jaǵdaıdyń ýaqyty bitkenmen, karantın áli de kúshinde.
Degenmen, indetti ózimiz órshitip aldyq. Qazir de aýrýhanalar adamǵa lyq toly. Tipti keıbir óńirler naýqastardy qabyldamaı jatyr. Koronavırýsten úıde emdelip jatqandar bar. Laıym olar tezirek saýyǵyp ketsin deıik, biraq karantınniń paıdasy bolǵanyn da aıta keteıik.
Ol eń aldymen jol-kólik oqıǵasyna tikeleı baılanysty. Ulttyq ekonomıka mınıstrligi Statıstıka komıtetiniń deregine júginsek, sońǵy bes aıda jol-kólik apaty kúrt tómendegen kórinedi. Ishimdik iship, kólik aıdaǵan 741 júrgizýshi ustalǵan. Bul 2019 jyldyń osy merzimimen salystyrǵanda kólik apaty oqıǵasynyń 33,3 paıyzǵa azaıǵanyn kórsetedi. Bul rette mamandar koronavırýs pen karantınniń áseri bolǵanyn da jasyrmaıdy. Óıtkeni adamdar eshqaıda shyqpaı, úıde oqshaýlandy, júrgizýshiler kólikke kóp otyrǵan joq. Osynyń bári de óz áserin tıgizgen bolýy kerek.
Desek te, ákimshilik jazaǵa tartylǵan 741 azamattyń 658-i ishimdik iship, esirtki qoldanǵany úshin júrgizýshi kýáliginen aırylǵan. Al qalǵandaryna ártúrli deńgeıdegi jazalar qoldanylǵan.
Bul jaǵdaıdy aımaqtyq deńgeıde qarastyratyn bolsaq, ishimdikke toıyp alyp, rýlge otyratyndardyń kósh basynda Batys Qazaqstan oblysy (87 adam) tur. Odan keıin Qostanaı oblysy - 75 adam, Mańqystaý oblysy -63 adam.
Eskerte keteıik, memleket basshysy Qasym-Jomart Toqaevtyń tapsyrmasymen jyl basynan beri ishimdik iship, rýlge otyratyn júrgizýshilerge qatysty talap qataıtyldy. Sondyqtan zańnyń qatańdyǵy da jaýapkershilikti arttyryp otyr.
Erkin Qaldan, «Adyrna» ulttyq portaly
