قازاقستاندا وسى جىلدىڭ 5 ايىندا جەدەل جاردەم بريگادالارى 3 ميلليوننان اسا شاقىرتۋعا قىزمەت كورسەتكەن. بەس وڭىردە شاقىرتۋ ايتارلىقتاي كوبەيگەن. بۇل تۋرالى ۇلتتىق شۇعىل مەديتسينانى ۇيلەستىرۋ ورتالىعى باسقارما توراعاسىنىڭ مىندەتىن اتقارۋشى باۋىرجان ءجۇسىپوۆ ايتتى، دەپ حابارلايدى Tengrinews.kz تىلشىسى.
باۋىرجان ءجۇسىپوۆتىڭ ايتۋىنشا، قازىر ەل بويىنشا 1967 سانيتاريالىق اۆتوكولىك بار.
"قر بويىنشا جەدەل مەديتسينالىق كومەك قىزمەتى 18 دەربەس جەدەل مەديتسينالىق كومەك ستانتسياسىنان، 87 قالالىق كىشى ستانتسياسىنان جانە 288 اۋداندىق جەدەل كومەك بولىمشەسىنەن تۇرادى. رەسپۋبليكا بويىنشا كۇن سايىن جەدەل كومەك شاقىرتۋلارىنا 1 400-گە جۋىق جەدەل مەديتسينالىق كومەك بريگادالارى قىزمەت كورسەتەدى. ونىڭ 23 پايىزى - مامانداندىرىلعان دارىگەرلىك بريگادا، 77 پايىزى - فەلدشەرلىك بريگادا... قازىرگى تاڭدا 1967 سانيتاريالىق اۆتوكولىك بار. وسى جىلى 807 بىرلىك جەدەل جاردەم كولىگىن ساتىپ الۋ جوسپارلانعان", - دەدى ول وكق ونلاين-بريفينگىندە.
ماماننىڭ ايتۋىنشا، جىل باسىنان بەرى جەدەل جاردەم شاقىراتىن تۇرعىنداردىڭ سانى ارتقان. ال ماۋسىم ايىندا بەس وڭىردە شاقىرتۋ ايتارلىقتاي كوبەيگەن. ولار: اقتوبە، قىزىلوردا وبلىستارى، شىمكەنت، الماتى جانە نۇر-سۇلتان قالالارى. سول سەبەپتى جەدەل جاردەم بريگاداسى بۇرىنعى ۋاقىتىنان 12-13 مينۋتقا كەشىگىپ كەلەدى.
"وسى جىلدىڭ 5 ايىندا جەدەل كومەك بريگادالارى 3 ميلليوننان اسا شاقىرتۋعا قىزمەت كورسەتتى. جالپى رەسپۋبليكا بويىنشا جەدەل مەديتسينالىق كومەك بريگادالارى كۇنىنە 18 مىڭ شاقىرتۋعا قىزمەت كورسەتىپ جاتىر. بىراق ماۋسىم ايىندا شاقىرتۋ 10 پايىزعا ءوستى. سونىڭ ىشىندە ايتارلىقتاي ءوسىم 15-22 ماۋسىم ارالىعىندا بولدى، تاۋلىگىنە 22 مىڭنان استام شاقىرتۋعا قىزمەت كورسەتتى. وڭىرلەر بويىنشا اقتوبە، قىزىلوردا وبلىستارىندا، شىمكەنت، الماتى جانە نۇر-سۇلتان قالالارىندا شاقىرتۋ كوبەيگەن. وسىعان بايلانىستى جەدەل كومەك بريگاداسىنىڭ شاقىرتۋ ورنىنا دەيىنگى ورتاشا كەلۋ ۋاقىتى 12-13 مينۋتقا ارتقانى بايقالادى", - دەدى ول.
مامان جەدەل جاردەم بريگاداسىنىڭ كەلۋ ۋاقىتى ناۋقاستىڭ جاعدايىنا بايلانىستى بولاتىنىن اتاپ ءوتتى.
"بۇل رەتتە ايتا كەتۋ كەرەك، بەكىتىلگەن ەرەجەگە سايكەس، شاقىرتۋلاردىڭ كەلۋ ۋاقىتى جەدەلدىلىك ساعاتىنا بايلانىستى. ياعني ناۋقاستىڭ ومىرىنە نەمەسە دەنساۋلىعىنا قاۋىپ تونگەن جاعدايدا جەدەل مەديتسينالىق كومەك بريگاداسىنىڭ كەلۋ ۋاقىتى 10-15 ۋاقىتتان اسپاۋى ءتيىس، ال پاتسيەنتتىڭ ومىرىنە نە دەنساۋلىعىنا ايقىن قاۋىپ بولماعان جاعدايدا كەلۋ ۋاقىتى 60 مينۋتقا دەيىن وزگەرەدى", - دەدى ءجۇسىپوۆ.
ەسكە سالايىق، ەلىمىزدىڭ بىرنەشە وڭىرىندە جەدەل جاردەم بريگاداسى ۋاقىتىلى كەلمەي شۋ شىقتى. سونداي-اق اقتوبە وبلىسىندا اۋرۋحانالار جەدەل جاردەم بريگاداسىمەن كەلگەن ناۋقاستى قابىلداۋدان باس تارتقانداردىڭ ۆيدەوسى تارادى.
