قر پارلامەنتى ءماجىلىسى جۋرناليستەرگە ارنالعان «پارلامەنت ءسوزى» جۇلدەسىنىڭ قورىتىندىسىن جاريالاپ، جەتى اتالىم بويىنشا جەڭىمپازداردى انىقتادى. بۇل تۋرالى ءماجىلىستىڭ ءباسپاسوز قىزمەتى حابارلادى.
"قازاق راديولارى" سەرىكتەستىگى "ارنايى رەپورتاج" اتالىمى بويىنشا ۇزدىك دەپ تانىلدى.
"پارلامەنت ءسوزى" جۇلدەسى «پارلامەنتتىك جۋرناليستيكانى دامىتۋعا قوسقان ۇلەسى ءۇشىن» اتالىمى بويىنشا «Qazaqstan dauiri» باس ديرەكتورى ساۋلە مەشىتباەۆا جانە «كاراۆان» گازەتىنىڭ باس رەداكتورى يگور شاحنوۆيچكە بەرىلسە، «ۇزدىك تەلەۆيزيالىق سيۋجەت ءۇشىن» نوميناتسياسىن «حابار» تەلەارناسىنىڭ ءتىلشىسى ينديرا جىلقايداروۆا جانە «ەۋرازيا» ءبىرىنشى ارناسىنىڭ» ءتىلشىسى سۆەتلانا پەنكوۆاعا بۇيىردى.
ال «ۇزدىك باسپا جاريالانىمى ءۇشىن» نوميناتسياسىن «ەگەمەن قازاقستان» گازەتىنىڭ ءتىلشىسى تەمىر قۇساينوۆ پەن «ليتەر» گازەتىنىڭ ۇجىمى يەلەندى. «ۇزدىك ينتەرنەت جانە راديو ماتەريالى» نوميناتسياسىن «Abai.kz» اقپاراتتىق پورتالى جانە سەرىك سابەكوۆ («Kazinform») يەلەندى.
«پارلامەنت ءسوزى» سىيلىعىنىڭ «ارنايى رەپورتاج» نوميناتسياسىن «قازاق راديولارى» جانە «حابار 24» تەلەارناسىنىڭ كوررەسپوندەنتى مارك بريۋشكو جەڭىپ الدى. «ۇزدىك بەينە – سۋرەت ماتەريالى ءۇشىن» نوميناتسياسىن «Nur Media» ءفوتوتىلشىسى سوۆەتبەك ماعزۋموۆ جانە «حابار» تەلەارناسىنىڭ باس وپەراتورى ەدىل ەرمەكباەۆ يەلەندى.
سونداي-اق، بيىل الەۋمەتتىك جەلىدەگى ۇزدەكتەر انىقتالدى. ولار «الەۋمەتتىك جەلىدەگى ۇزدىك ماتەريال ءۇشىن» نوميناتسياسىن العاش رەت جۋرناليست-بلوگەر وركەن كەنجەبەك جانە YEDILOV ONLINE Telegram-كانالىنىڭ اۆتورى ەربول ەدىلوۆ يەلەندى.
سونىمەن قاتار، ءماجىلىس توراعاسى نۇرلان نىعماتۋليننىڭ باستاماسىمەن بيىلعى جىلى «پارلامەنت ءسوزى» ارنايى سىيلىعى» نوميناتسياسى جۋىق ارادا عانا دۇنيەدەن وتكەن بەلگىلى قازاقستاندىق جۋرناليست بەيسەن قۇرانبەككە بەرىلدى. ءماجىلىس توراعاسىنىنىڭ ايتۋىنشا، بەيسەن قۇرانبەكتەي وتاندىق تەلەۆيزيانىڭ دامۋىنا زور ۇلەس قوسقان، ءبىلىمدى، تاجىريبەلى ازاماتتىڭ ەڭبەگى حالىقتىڭ قوشەمەتىنە لايىق.
ايتا كەتۋ كەرەك، 2016 جىلدان باستاپ جىل سايىن وتكىزىلەتىن سىيلىق قورىتىندىسىن شىعارۋ ەلىمىزدە ورىن العان كوروناۆيرۋس ىندەتىنە بايلانىستى بيىلعى جىلى بىرقاتار وزگەرىستەرگە ۇشىرادى. ءماجىلىس «پارلامەنت ءسوزى» سىيلىعىنىڭ يەگەرلەرىن ءماجىلىس سيمۆوليكاسى بەينەلەنگەن مۇسىنشەلەرمەن جانە ارنايى ديپلومدارمەن ماراپاتتاۋدى پارلامەنتتىڭ كۇزگى سەسسياسىندا وتكىزەدى دەپ جوسپارلاۋدا.
دۋلات ابيبۋللاەۆ، "قازاق راديولارى" جشس باس رەداكتورى:
–سەرىكتەستىك قۇرامىندا ءتورت راديوارنا – "قازاق راديوسى", "شالقار", "كلاسسيك" جانە "استانا راديوسى" بار. ولاردان پارلامەنتتىڭ تىنىس-تىرشىلىگىنە قاتىستى "پارلامەنت ساعاتى", "دەپۋتات ساعاتى", "پراۆو زنات" سەكىلدى حابارلار ەفيرگە شىعادى. ەلدەگى قۇقىقتىق رەفورمالار مەن زاڭنامالىق وزگەرىستەردى تىڭدارماندارعا ءتۇسىندىرۋ – تىلشىلەر مەن دەپۋتاتتاردىڭ ورتاق ماقساتى.
"ادىرنا" ۇلتتىق پورتالى
