اقتوبە وبلىسىندا جەدەل پنەۆمونيا جۇقتىرعاندار سانى ماۋسىم ايىندا التى ەسە كوبەيگەن.
«جاعداي قيىنداپ كەتكەندىكتەن اقتوبەدەگى 3 ستاتسيونار بازاسىنان پۋلمونولوگيا ءبولىمىن جاساقتاپ، كەرەۋەت سانىن 446-عا دەيىن كوبەيتۋگە ءماجبۇر بولدىق» دەيدى وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى سۆەتلانا ەسەنامانوۆا.
دەنساۋلىق ساقتاۋ باسقارماسىنىڭ مالىمەتىنشە، ماۋسىم ايى باستالعالى 650 ادامعا جەدەل پنەۆمونيا دياگنوزى قويىلعان.
- اقتوبەدە پنەۆمونيانى ەمدەيتىن دارىگەر جەتىسپەي جاتىر. وتكەن ءتۇنى 10 دارىگەردىڭ جۇمىسىن 4 ادام اتقاردى. ءۇش ستاتسيونارداعى قيىن احۋالدى كورىپ، جۇمىس ىستەۋدەن باس تارتىپ جاتقان دارىگەرلەر دە بار. وسىعان وراي ەمحانالارداعى جوسپارلى جۇمىستى تولىعىمەن توقتاتىپ، ونداعى مامانداردى پۋلمونولوگيا بولىمدەرىنە تارتۋ تۋرالى بۇيرىق شىعاردىم، - دەيدى اقتوبە وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى سۆەتلانا ەسەنامانوۆا.
سوڭعى ءۇش تاۋلىكتە اقتوبە وبلىسىندا جەدەل پنەۆمونيادان 8 ادام قازا بولعان. 22 ادام حال ۇستىندە جاتىر. پنەۆمونيا جۇقتىرعانداردىڭ اراسىندا مەديتسينا قىزمەتكەرلەرى دە كوپ. جاعدايى كۇرت قيىنداعان 16 ناۋقاستى دارىگەرلەر جاساندى تىنىس الۋ اپپاراتىنا قوسۋعا ءماجبۇر بولعان.
جەدەل پنەۆمونيانى ەمدەۋ ءۇشىن جاساقتالعان ءۇش ستاتسيوناردىڭ ءبىرى اقتوبەدەگى تەمىرجول اۋرۋحاناسىندا ورنالاسقان. جۇما كۇنى ءتۇس الپەتىندە اۋرۋحانا جانىندا تۋىستارىنىڭ حالىنە الاڭداپ جىلاپ-سىقتاپ جۇرگەندەر وتە كوپ بولدى. توسەك تارتىپ قالعان تۋىسىنىڭ جاعدايىن بىلە الماي جۇرگەندەر اكىمدىككە، دەنساۋلىق ساقتاۋ باسقارماسىنا حابارلاسۋ مۇمكىن ەمەسىن ايتادى.
ازاتتىق تىلشىسىنە سۇقبات بەرگەن قالا تۇرعىنى ەرجان وڭعاربايدىڭ 67 جاستاعى اپكەسى وسىدان ءۇش كۇن بۇرىن پنەۆمونيادان قايتىس بولعان. مارقۇمنىڭ 36 جاستاعى بالاسى دا پۋلمونولوگيا بولىمىندە حال ۇستىندە جاتىر.
- جيەنىمنىڭ جاعدايى اۋىر. دارىگەرلەرمەن سويلەسەيىن دەسەم، تاڭ اتقالى جاۋاپ بەرەتىن ءبىر ادامعا جولىعا الماي تۇرمىن. جاعدايى مەنىڭ جيەنىمنەن گورى تاۋىرلەۋ، سويلەي الاتىن ناۋقاستار دارىگەر دە، مەدبيكە دە جەتىسپەيدى دەيدى. بۇلاي بولمايدى عوي! قينالىپ جاتقان ادامداردى دارىگەرلەر ەمدەۋى كەرەك ەمەس پە؟ - دەيدى ەرجان وڭعارباي.
اقتوبە وبلىستىق دەنساۋلىق ساقتاۋ باسقارماسىنىڭ دەرەگىنشە، پنەۆمونيامەن اۋرۋحاناعا تۇسكەن پاتسيەنتتەردەن COVID-19 تابىلماعان. بىراق ەكى اۋرۋدىڭ بەلگىلەرى وتە ۇقساس. بۇرىن-سوڭدى مۇنداي جاعدايمەن كەزدەسپەگەن دارىگەرلەر جاپپاي پنەۆمونيانىڭ COVID-پەن بايلانىسى بار-جوعىن ايتا الماي وتىر.
19 ماۋسىم كۇنگى مالىمەت بويىنشا، اقتوبە وبلىسىندا بارلىعى 853 ادامنان كوروناۆيرۋس تابىلعان: 588 ادامدا اۋرۋ بەلگىلەرى بار، 265 ادامنان COVID-19 بەلگىسى بايقالماعان. رەسمي مالىمەت بويىنشا، كوروناۆيرۋستان ءبىر ادام قايتىس بولعان. بۇعان دەيىن اقتوبە وبلىسىندا كوروناۆيرۋس جۇقتىرعان ءۇش ادامنىڭ قايتىس بولعانى حابارلانعان. بىراق كەيىنىرەك ءولىم-ءجىتىمدى زەرتتەۋ كوميسسياسى ولاردىڭ "كوروناۆيرۋستان قايتىس بولماعانىن" ايتقان.
"ازاتتىق" راديوسى
