Aqtóbe oblysynda jedel pnevmonııa juqtyrǵandar sany maýsym aıynda alty ese kóbeıgen.
«Jaǵdaı qıyndap ketkendikten Aqtóbedegi 3 staıonar bazasynan pýlmonologııa bólimin jasaqtap, kereýet sanyn 446-ǵa deıin kóbeıtýge májbúr boldyq» deıdi oblystyq densaýlyq saqtaý basqarmasy basshysynyń mindetin atqarýshy Svetlana Esenamanova.
Densaýlyq saqtaý basqarmasynyń málimetinshe, maýsym aıy bastalǵaly 650 adamǵa jedel pnevmonııa dıagnozy qoıylǵan.
- Aqtóbede pnevmonııany emdeıtin dáriger jetispeı jatyr. Ótken túni 10 dárigerdiń jumysyn 4 adam atqardy. Úsh staıonardaǵy qıyn ahýaldy kórip, jumys isteýden bas tartyp jatqan dárigerler de bar. Osyǵan oraı emhanalardaǵy josparly jumysty tolyǵymen toqtatyp, ondaǵy mamandardy pýlmonologııa bólimderine tartý týraly buıryq shyǵardym, - deıdi Aqtóbe oblystyq densaýlyq saqtaý basqarmasy basshysynyń mindetin atqarýshy Svetlana Esenamanova.
Sońǵy úsh táýlikte Aqtóbe oblysynda jedel pnevmonııadan 8 adam qaza bolǵan. 22 adam hal ústinde jatyr. Pnevmonııa juqtyrǵandardyń arasynda medıına qyzmetkerleri de kóp. Jaǵdaıy kúrt qıyndaǵan 16 naýqasty dárigerler jasandy tynys alý apparatyna qosýǵa májbúr bolǵan.
Jedel pnevmonııany emdeý úshin jasaqtalǵan úsh staıonardyń biri Aqtóbedegi temirjol aýrýhanasynda ornalasqan. Juma kúni tús álpetinde aýrýhana janynda týystarynyń haline alańdap jylap-syqtap júrgender óte kóp boldy. Tósek tartyp qalǵan týysynyń jaǵdaıyn bile almaı júrgender ákimdikke, densaýlyq saqtaý basqarmasyna habarlasý múmkin emesin aıtady.
Azattyq tilshisine suqbat bergen qala turǵyny Erjan Ońǵarbaıdyń 67 jastaǵy ápkesi osydan úsh kún buryn pnevmonııadan qaıtys bolǵan. Marqumnyń 36 jastaǵy balasy da pýlmonologııa bóliminde hal ústinde jatyr.
- Jıenimniń jaǵdaıy aýyr. Dárigerlermen sóıleseıin desem, tań atqaly jaýap beretin bir adamǵa jolyǵa almaı turmyn. Jaǵdaıy meniń jıenimnen góri táýirleý, sóıleı alatyn naýqastar dáriger de, medbıke de jetispeıdi deıdi. Bulaı bolmaıdy ǵoı! Qınalyp jatqan adamdardy dárigerler emdeýi kerek emes pe? - deıdi Erjan Ońǵarbaı.
Aqtóbe oblystyq densaýlyq saqtaý basqarmasynyń dereginshe, pnevmonııamen aýrýhanaǵa túsken paıentterden COVID-19 tabylmaǵan. Biraq eki aýrýdyń belgileri óte uqsas. Buryn-sońdy mundaı jaǵdaımen kezdespegen dárigerler jappaı pnevmonııanyń COVID-pen baılanysy bar-joǵyn aıta almaı otyr.
19 maýsym kúngi málimet boıynsha, Aqtóbe oblysynda barlyǵy 853 adamnan koronavırýs tabylǵan: 588 adamda aýrý belgileri bar, 265 adamnan COVID-19 belgisi baıqalmaǵan. Resmı málimet boıynsha, koronavırýstan bir adam qaıtys bolǵan. Buǵan deıin Aqtóbe oblysynda koronavırýs juqtyrǵan úsh adamnyń qaıtys bolǵany habarlanǵan. Biraq keıinirek ólim-jitimdi zertteý komıssııasy olardyń "koronavırýstan qaıtys bolmaǵanyn" aıtqan.
"Azattyq" radıosy
