تۇركىستان وبلىسىندا پوليتسيا قىزمەتكەرلەرى ونلاين-الاياقتىققا قاتىسى بار كۇدىكتىنى قولعا ءتۇسىردى، – دەپ حابارلايدى Polisia.kz.
كەنتاۋ قالالىق پب-ءنىڭ كەزەكشى بولىمىنە شىمكەنت قالاسىنىڭ تۇرعىنى ارىزدانىپ، اۆتوكولىكتىڭ قوسالقى بولشەكتەرىن ساتىپ الامىن دەپ الاياقتىڭ قۇربانى بولعانىن جەتكىزدى. جابىرلەنۋشىنىڭ ايتۋىنشا، ول “WhatsApp” مەسسەندجەرى ارقىلى “كاماز” اۆتوكولىگىنىڭ دوڭگەلەگىن ساتۋ تۋرالى حابارلاندىرۋدى كورگەن. سودان جابىرلەنۋشى ەر ادام ساتۋشىمەن حابارلاسادى. ساتۋشى بولسا، حابارلاسقان تۇرعىننىڭ سەنىمىنە كىرىپ، 20 دانا دوڭگەلەكتى 800 مىڭ تەڭگەگە ساتۋعا ۋادە بەرگەن. الايدا، جابىرلەنۋشى ساتۋشىعا 200 مىڭ تەڭگەگە جۋىق قارجى اۋدارعاننان كەيىن، الاياق ۋادەسىن ورىنداماي، جوق بولىپ كەتكەن.
اتالعان جايت پوليتسيا قىزمەتكەرلەرى قر قىلمىستىق كودەكسىنىڭ 190-بابى (الاياقتىق) بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەپ، كۇدىكتىنى ۇستاۋ بويىنشا قاجەتتى شارالاردى قولعا الدى. قىلمىستى اشۋ ماقساتىندا پوليتسيا بولىمىندە تاجىريبەلى ءتارتىپ ساقشىلارىنان جەدەل-تەرگەۋ توبى قۇرىلدى.
جەدەل-ىزدەستىرۋ ءىس-شارالارىنىڭ قورىتىندىسىنا سايكەس كەنتاۋ قالاسىنىڭ پوليتسيا قىزمەتكەرلەرى كۇدىكتىنى كورشى وبلىستان ۇستادى. ول قىزىلوردا وبلىسىنىڭ تۇرعىنى بولىپ شىقتى. كەنتاۋ قپب-ءنىڭ ۋاقىتشا ۇستاۋ يزولياتورىنا قاماۋعا الىندى. قازىرگى ۋاقىتتا الاياقتىق دەرەگى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. پوليتسيا قىزمەتكەرلەرى جىگىتتىڭ بۇدان باسقا دا قىلمىستارعا قاتىستىلىعىن انىقتايدى. تۇركىستان وبلىسىنىڭ پوليتسەيلەرى تۇرعىندارعا الاياقتارعا الدانباۋ ءۇشىن مۇقيات بولۋعا جانە تىم سەنگىش بولماۋعا كەڭەس بەرەدى.
سايتتاردان بولەك الەۋمەتتىك جەلىلەردە تاۋارلاردى ساتۋ تۋرالى حابارلاندىرۋلار - قوعامدا كەڭىنەن تارالعان الاياقتىقتىڭ ءتۇرى. ادەتتە، الاياقتار ءوز قۇرباندارىن تومەن باعامەن جانە ءتيىمدى ۇسىنىستارمەن قىزىقتىرىپ، الدىن الا تولەم جاساۋدى تالاپ ەتەدى. عالامتور ارقىلى ساتىپ الۋ كەزىندە اقپاراتتىڭ شىنايىلىعىنا كوز جەتكىزۋ قاجەت. مۇمكىن بولسا رەسمي سايتتارى پايدالانىپ، تاۋاردى قولعا العا كەزدە عانا تولەم جاساڭىز. ەگەر ساتۋشى تاۋار ءۇشىن تولىق نەمەسە ءىشىنارا الدىن الا تولەمدى تالاپ ەتسە، ول بىردەن كۇمان تۋعىزاتىنى انىق. بەيتانىس ادامدارعا تولەم جۇيەلەرى ارقىلى اقشا اۋدارساڭىز، ولاردى قايتارۋ كەپىلدىگىڭىز جوق ەكەنىن ەستە ساقتاڭىز. ەگەر ءسىز الاياقتىقتىڭ قۇربانى نەمەسە كۋاگەرى بولساڭىز، وندا تەز ارادا “102” تەلەفونى ارقىلى پوليتسياعا حابارلاسىڭىز.
الماتى قالاسىنىڭ تۇرعىنى ەلدار قۋانىش ينتەرنەت ارقىلى كيىمگە تاپسىرىپ بەرىپ، 14 كۇننەن بەرى تاۋارعا قول جەتكىزە الماي جۇرگەنىن ايتتى. بۇل جاعداي تۋرالى مامانداردىڭ پىكىرىن سۇراپ بىلدىك:
ايسانا سمان، زاڭگەر: “ينتەرنەتتەن ساتىپ الۋ تۋرالى زاڭناما جوق. ازاماتتىق كودەكستە دە ونلاين ساۋدا ەرەكشە اتالماعان. سوندىقتان تۇتىنۋشى ساتىپ الۋ كەزىندە بارلىق جاعدايدى ەسكەرۋ قاجەت”
ساكەن ەرلان، Sمم مامانى: ءسىز ىزدەگەن سايتتا شيفرلاندىرۋدى تەكسەرۋىڭىز كەرەك. ونداي شيفرلاندىرۋ بولماسا، ءسىز نەسيە كارتاڭىزدىڭ ءنومىرىن، اسىرەسە CVC كودىن جازباۋىڭىزدى ەسكەرتەمىز”.
ونلاين ساۋدا ۋاقىتىڭىز بەن قاراجاتىڭىزدى ۇنەمدەيتىنى راس. دۇكەندەردىڭ سەنىمدىسىن تاڭداپ، ساۋدا جاساۋ ءۇشىن قاۋىپسىزدىك شارالارىن ەسكەرگەنىڭىز ءجون.
اياۋلىم ءابىلدا، "ادىرنا" ۇلتتىق پورتالى.
