جاقىندا "الماتىدا اتىشۋلى رىجي المازدىڭ باۋىرى سوتتالدى" دەگەن تاقىرىپپەن ماقالالار اقپاراتتىق سايتتاردا كەزەك-كەزەك جاريالاندى. وندا ترانستەلەكومنىڭ بۇرىنعى باسشىسى اسقار ناسەنوۆكە ءتورت جىلدىق ۇكىم شىعارىلعانى جازىلعان.
اسقار ناسەنوۆتى نەسىپبايدىڭ باۋىرى دەپ جازۋ ارقىلى مۇددەلى توپ الدىمەن "رىجي المازدىڭ" اتىن مالدانۋدى، ەكىنشىدەن تۋىستىق قاتىناس ارقىلى بيلىككە، باسشىلىققا تانىستىقپەن جولمەن جەتتى دەگەندى كوزدەپ وتىر. بۇل تۇبىرىمەن قاتە وي، تەرىس تۇسىنىك.
اسقار مەن نەسىپبايدىڭ اكەسى ءبىر بولعانىمەن، شەشەلەرى بولەك. "رىجي المازدىڭ" اتىشۋلى كەزەڭىندە باسقا ىنىلەرى وتە جاس بولدى. ەكونوميست ءارى تاريحشى اكەسى ب. ناسەنوۆتىڭ ەستەلىگىندە نەسىپبايدىڭ باۋىرلارىنا كەسىرىن تيگىزبەۋ ماقساتىندا ولارمەن جاقىن ارالاسپاعانى جەتكىلىكتى دالەلدەنگەن.
ەڭ سوراقىسى، ا. ناسەنوۆتىڭ قىزمەتىن 22 جىل بۇرىن (1998 جىلعى 31 مامىر) كىسى قولىنان وپات بولىپ كەتكەن نەسىپباي مارقۇمنىڭ ەسىمىمەن بايلانىستىرا جازۋ ەش اقىلعا سىيمايدى.
ايىپتالىپ وتىرعان ا. ناسەنوۆ - جوعارى ءبىلىم العان، سول بىلىمىمەن ءبىرتالاي بەلەستى باعىندىرعان ساناۋلى ماماننىڭ ءبىرى. ونىڭ ءبىر باسىنا جەتەرلىك قارىم-قابىلەتىمەن "رىجي المازدىڭ" اتاعىن، اقشاسىن پايدالانىپ، قىزمەتكە كوتەرىلۋى مۇمكىن ەمەس.
اسقاردىڭ اكەسى بولاتبەك ناسەنۇلى ەلىمىزدىڭ سالىق، ەكونوميكا، كىرىستەر مينيسترلىگىندە ۇزاق جىلدار قىزمەت سىڭىرگەن. ول كىسى بالالارىنىڭ جوعارى ءبىلىم الۋى، ادال، پايدالى قىزمەت ەتۋى ءۇشىن جاقسى تاربيە بەرىپ وسىرگەن.
ۇلىنىڭ جازىقسىز سوتتالىپ وتىرعانىنا، جالعان پروكۋرورلار مەن الاياق سوتتاردىڭ كەسىرىنەن تۇرمەگە ناقاق قامالعانىنا، ونى جۇزەگە اسىرۋشى ءبىر توپتىڭ بارىنا سەنىمدى.
اقپاراتتىق سايتتاردىڭ جەردەن جەتى قويان تاپقانداي جارىسا جاريالاۋى ولاردىڭ اقپاراتتىڭ اق-قاراسىن اجىراتپاي، تەك بىرجاقتى كەتىپ، ايىپتاۋشى تاراپتىڭ مۇددەسىنە قىزمەت ەتىپ وتىرعانىن ايعاقتايدى.
زاڭعار كارىمحان
