مەملەكەت باسشىسى قاسىم-جومارت توقاەۆتىڭ ءباسپاسوز حاتشىسى كوروناۆيرۋس جۇقتىردى. بۇل تۋرالى بەرىك ءۋالي Facebook جەلىسىندە جازدى.
"ارداقتى اعايىن!
وكىنىشكە قاراي، بۇگىن اسا ءبىر جايسىز جاڭالىقتى جاريالايىن دەپ وتىرمىن. الەمدى اينالىپ، ەلىمىزدى شارلاپ كەتكەن كوروناۆيرۋس ىندەتى مەنەن دە تابىلدى. كەشە تاپسىرعان تەست قورىتىندىسى وڭ ناتيجە بەردى. قازىر اۋرۋحانادا، دارىگەرلەردىڭ قاراۋىندا جاتىرمىن. جاعدايىم ءبىر قالىپتى. اسا الاڭدايتىنداي ەمەس. ەم قابىلداۋدامىن.
باسىن اشىپ ايتاتىن ماسەلە، پرەزيدەنت بەلگىلەنگەن كەستەگە سايكەس جۇمىس ىستەپ جاتىر. مەملەكەت باسشىسىنىڭ دەنساۋلىعىنا ەشقانداي قاۋىپ ءتونىپ تۇرعان جوق. قاسىم-جومارت كەمەلۇلى ۇنەمى تەست تاپسىرىپ، قورىتىندىسىن الىپ وتىر. اقوردادا سانيتارلىق رەجيم كۇشەيتىلىپ، قاۋىپسىزدىك شارالارى قاتايتىلعان.
وسى ىندەت باستالعالى بارلىعىمىز دابىل قاعىپ، ساقتانۋعا، دەرتتى جۇقتىرماۋدىڭ جولدارىن قاراستىرۋعا شاقىرىپ كەلەمىز. بىراق پاندەمياعا سەنبەيتىن، اۋرۋدى جوق دەۋشىلەر ازايماي تۇر. وندايدا "اۋىرعان ادامدى كورسەتىڭدەرشى", "مەنىڭ تانىسىمنىڭ بىردە-ءبىرى اۋىرعان جوق. سوندا ونىمەن كىم اۋىرىپ جاتىر؟", "اۋىرعان ادامداردىڭ اتتارىن نەگە اتامايدى؟" دەگەن سياقتى پىكىرلەردى ءجيى ەستيتىنبىز. مىنە، مەن دەرت جۇقتىردىم، ونى جاسىرماي جاريالاپ وتىرمىن. مۇنداعى ماقسات الاڭسىز جۇرگەن ازاماتتار ويلانسىن، سەنبەي جۇرگەن كىسىلەردىڭ كوزى جەتسىن دەگەنىم. اۋرۋ بار. ونى جۇقتىرۋشىلاردىڭ سانى كۇن سايىن ارتىپ جاتىر. قانشا جەردەن ساقتىق شارالارىن قاتاڭ ساقتاپ جۇرسەك تە، ءبىز دە جۇقتىردىق. ەندى ەمدەلۋ كەرەك.
بارشاڭىزدى وزدەرىڭىزدىڭ جانە جاقىندارىڭىزدىڭ دەنساۋلىعىن ساقتاۋ ءۇشىن كارانتين رەجيمى مەن پروفيلاكتيكالىق شارالاردى ۇستانۋعا شاقىرامىن. پاندەمياعا جەڭىل-جەلپى قاراۋعا بولمايدى.
بارلىعىڭىزعا اماندىق تىلەيمىن!" دەدى توقاەۆتىڭ ءباسپاسوز حاتشىسى.
قازاقستاندا كوروناۆيرۋس جۇقتىرعانداردىڭ سانى 1 2511-گە جەتتى. 7 135 ادام ايىقسا، 53 ادام قايتىس بولعان.
