قازىرگى كەزدە رەسپۋبليكا بويىنشا ءاربىر اكىمدىكتە باسپانا كەزەگى جۇرگىزىلەدى. ال وتباسى بانكىندە بىرىڭعاي ءتىزىم بولادى دەگەن جوسپار بار.
يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ وتباسى بانكىن قۇرۋ تۋرالى ايتىپ بەردى، دەپ حابارلايدى Sputnik قازاقستان تىلشىسى.
ءمينيستردىڭ ايتۋىنشا، جاڭا تۇرعىن ءۇي ساياساتى بويىنشا ءاربىر ادام قالتاسىنا قاراي باسپانا الۋى قاجەت. وسىعان وراي اكىمدىك كەزەگىندە تۇرعان ازاماتتارعا دا ءۇي الۋدى سان الۋان جولدارى ۇسىنىلادى. تابىسى تومەن ادامدار جالدامالى ۇيگە كىرە الادى، ال كىرىسى جوعارى ازاماتتار ءۇشىن جەڭىلدەتىلگەن يپوتەكا قاراستىرىلعان. وسى جۇمىسپەن بۇرىنعىداي تۇرعىن ءۇي قۇرىلىس جيناق بانكى اينالىسادى.
بىراق ونىڭ اتاۋىن "وتباسى بانك" دەپ وزگەرتۋ ۇسىنىلىپ وتىر. سونىڭ نەگىزىندە "العاشقى باسپانامەن قامتاماسىز ەتۋ ورتالىعى" قۇرىلادى.
"جاڭا جۇيە بويىنشا ادامدار تابىسىنا قاراي تۇرعىن ءۇي ساتىپ الۋ جولدارىن تاڭدايدى. مىسالى، ەگەر تابىسىڭىز 1 ەڭ تومەنگى كۇنكورىس دەڭگەيىنە، ياعني 32,7 مىڭ تەڭگەگە جەتپەسە، وندا ءسىزدىڭ جالدامالى پاتەردى الۋعا قۇقىعىڭىز بار. ونداي باسپانا جەكە مەنشىككە ساتىلمايدى. سوندا وسى ساناتتاعى ادام وتباسى بانكىنە كەلىپ، تىركەۋگە تۇرادى. ءسويتىپ، كەزەككە تۇرىپ، جالدامالى پاتەر باعدارلاماسى بويىنشا باسپانا الادى", - دەدى اتامقۇلوۆ بۇگىنگى ەسەپ بەرۋ كەزدەسۋىندە.
ونىڭ سوزىنە قاراعاندا، قازىرگى كەزدە رەسپۋبليكا بويىنشا ءاربىر اكىمدىكتە باسپانا كەزەگى جۇرگىزىلەدى. ال وتباسى بانكىندە بىرىڭعاي ءتىزىم بولادى دەگەن جوسپار بار.
"بۇل دەگەنىمىز، قازاقستان ازاماتى "وتباسى بانكىنىڭ" اقپاراتتىق بازاسىندا بولاتىن كەزەك بويىنشا باسپانانى كەز كەلگەن وبلىستا الا الادى", - دەيدى اتامقۇلوۆ.
