الماتى وبلىسىندا كوروناۆيرۋس زيراتىنا جەرلەنگەندەر كوبەيدى. ال رەسمي مالىمەت وزگەرمەدى

3239
Adyrna.kz Telegram
كوروناۆيرۋستان قايتىس بولعاندار زيراتى. الماتى وبلىسى، قاراوي اۋىلى ماڭى. 29 مامىر 2020 جىل.

قازىر زيراتتىڭ مۇسىلماندىق عۇرىپپەن جەرلەنگەندەر جاعىندا - 18, حريستياندىق عۇرىپپەن جەرلەنگەندەر جاعىندا 20 ادامنىڭ بەيىتى جاتىر. ال رەسمي دەرەك بويىنشا، الماتى قالاسىندا كوروناۆيرۋستان قايتىس بولعاندار سانى وزگەرمەگەن: الماتى قالاسىندا 10 ادام كوروناۆيرۋستان قايتىس بولعان، الماتى وبلىسىندا ادام ءولىمى تىركەلمەگەن.

ازاتتىق ءتىلشىسىنىڭ حابارلاۋىنشا، زيراتقا جاڭادان جەرلەنگەندەردىڭ بەيىتىنە تاقتاتاس تا قويىلماعان. بەيىت باسىنداعى اعاش بەلگىگە 6 ساننان تۇراتىن ءنومىر جازىلعان. جۇما كۇنى بەيىت ماڭىندا ەشكىم بولمادى. ازاتتىق ءتىلشىسى 29 مامىردا تۇستە رەسمي ورگانداردان جاۋاپ الا المادى.

قازاقستاندا رەسمي دەرەك بويىنشا كوروناۆيرۋستان قايتىس بولعاندار مەن ۆيرۋس جۇقتىرعاندار زيراتىنا جەرلەنگەندەر سانى اراسىنداعى سايكەسسىزدىكسوڭعى بىرنەشە كۇننەن بەرى ايتىلا باستاعان. بۇعان دەيىن وسىعان ۇقساس جاعداي شىمكەنت جانە نۇر-سۇلتان قالالارىندا بولعان.

وسى اپتادا دەنساۋلىق ساقتاۋ مينيسترلىك وكىلدەرى ارنايى زيراتقا جەرلەنگەن كەيبىر ادامداردىڭ ولىمىنە كوروناۆيرۋس ينفەكتسياسى سەبەپ بولعان جوق دەپ ايتقان ەدى. الماتى اكىمدىگى وكىلدەرى دە سوعان ۇقساس جاۋاپتى قايتالاعان.

ءساۋىر ايىنىڭ سوڭىندا دەنساۋلىق ساقتاۋ مينيسترلىگى ءار ايماقتا كوروناۆيرۋس جۇقتىرىپ قايتىس بولعانداردىڭ ءولىمىن تەكسەرەتىن كوميسسيا قۇرعان. ولار مارقۇمنىڭ ولىمىنە كوروناۆيرۋس اسەر ەتكەنىن يا باسقا سوزىلمالى دەرتى سەبەپ بولعانىن انىقتاۋى ءتيىس. كوميسسيا "كوروناۆيرۋس مارقۇمنىڭ ولىمىنە جاناما تۇردە اسەر ەتكەن، نەگىزگى ءولىمى سوزىلمالى دەرتتەن بولعان" دەپ تاپسا، قايتىس بولعان ادام رەسمي ستاتيستيكاعا ەنبەيدى. ​

دۇنيەجۇزىلىك دەنساۋلىق ساقتاۋ ۇيىمى (ددسۇ) الەم ەلدەرىنە قايتىس بولعان ادامنان COVID-19 انىقتالسا، باسقا قانداي اۋرۋى بارىنا قاراماستان مارقۇمدى كوروناۆيرۋستان كوز جۇمعاندار ستاتيستيكاسىنا ەنگىزۋدى ۇسىنعان.

قازاقستان دەنساۋلىق ساقتاۋ مينيسترلىگىنىڭ 29 مامىرداعى رەسمي مالىمەتىنشە, ەلدە 9932 ادامنان كوروناۆيرۋس تابىلدى. 4900 ادام دەرتتەن ايىقتى. ال مينيسترلىكتىڭ كوروناۆيرۋستان كوز جۇمعاندار ستاتيستيكاسىنا ەنگەن 37 مارقۇم مىنا ايماقتاردا:

  • الماتى قالاسى – 10
  • شىمكەنت قالاسى – 6
  • نۇر-سۇلتان قالاسى – 6
  • اقمولا وبلىسى – 4
  • قاراعاندى وبلىسى – 3
  • پاۆلودار وبلىسى – 2
  • شىعىس قازاقستان وبلىسى – 1
  • جامبىل وبلىسى – 1
  • قوستاناي وبلىسى – 2
  • ماڭعىستاۋ وبلىسى – 1
  • تۇركىستان وبلىسى – 1
پىكىرلەر