توتەنشە جاعداي رەجيمى كەزىندە قارۋلى كۇشتەردىڭ اسكەري قىزمەتشىلەرى قازاقستاننىڭ 29 قالاسىندا جالپى اۋدانى 50 ميلليون شارشى مەتردەن اساتىن 10,5 مىڭنان استام الەۋمەتتىك ماڭىزى بار نىساندارعا جانە ۇزىندىعى 4000 شاقىرىمعا جۋىق جول ۋچاسكەلەرىنە دەزينفەكتسيا جۇرگىزدى.
كوروناۆيرۋستىق ينفەكتسيانىڭ تارالۋى ءالى دە جالعاسۋدا، دەنساۋلىق ساقتاۋ مينيسترلىگى ەل ازاماتتارىن كارانتيندىك شارالاردى ساقتاۋعا شاقىردى.
ەلدەگى توتەنشە جاعداي رەجيمى الىنعانىنا قاراماستان، ۆيرۋستىڭ تارالۋ قاۋپى وتە جوعارى بولىپ وتىر.
اسكەري قىزمەتشىلەر كەيبىر قالالاردا كارانتيندىك شارالاردىڭ السىرەۋىنە قاراماستان، دەزينفەكتسيالاۋ جۇمىستارىن جۇرگىزۋدى جالعاستىرۋدا.
اسكەري قىزمەتشىلەر العاش رەت بەتپە-بەت كەلگەن كوروناۆيرۋستىق ينفەكتسيامەن كۇرەس تاجىريبەسىن وسى سالاداعى ماماندارمەن مۇقيات زەردەلەپ، ءتيىستى شارالاردى دۇرىس ۇيىمداستىرا ءبىلدى. قالالاردا بۇرىن ەنگىزىلگەن بارلىق شەكتەۋلەر قاتاڭ باقىلاۋدا.
ەلىمىزدىڭ ازاماتتارى دەنساۋلىعىنىڭ قاۋىپسىزدىگىن قامتاماسىز ەتۋ ماقساتىندا پروفيلاكتيكالىق جانە سانيتارلىق - ەپيدەمياعا قارسى ءىس-شارالاردى ورىنداۋعا «شىعىس» وڭىرلىك قولباسشىلىعىنىڭ اسكەري قىزمەتشىلەرى قاتىسۋدا. «ءبىز قاۋىپتى دەرتتىڭ ءورشىپ تۇرعانىن دۇرىس ءتۇسىنىپ، ساقتىق شارالارىن قاتاڭ ساقتاۋىمىز قاجەت. بۇگىنگى دەزينفەكتسيالاۋ جۇمىستارى قالا تۇرعىندارىنىڭ قاۋىپسىزدىگى ءۇشىن جاسالۋدا»، - دەپ اتاپ ءوتتى دەزينفەكتسيا شارالارىنا قاتىسۋشى ەفرەيتور مۇحامەد بايانباەۆ.
دەزينفەكتسيالاۋعا سەمەي قالاسىندا 110 اسكەري قىزمەتشى مەن 13 ارنايى تەحنيكا جۇمىلدىرىلدى. ءبىر كۇننىڭ ىشىندە اسكەري قىزمەتشىلەر جالپى اۋدانى شامامەن 20 000 م2 الەۋمەتتىك ماڭىزى بار نىساندار مەن حالىق كوپ شوعىرلانعان جەرلەردى دەزينفەكتسيالاۋ ءۇشىن 1000 م3 ارنايى ەرىتىندىسى قولدانىلدى. دەزينفەكتسيالاۋ شارالارىنا جۇمىلدىرىلعان ارنايى اسكەري تەحنيكانىڭ جول ءجۇرۋ قاۋىپسىزدىگىن اسكەري اۆتوكولىك ينسپەكتسياسى قىزمەتكەرلەرى قامتاماسىز ەتتى. ءار نىساندى وڭدەۋ شارالارى مۇقيات ۇيىمداستىرىلدى.
"ادىرنا" ۇلتتىق پورتالى
