پوليتسيا قىزمەتكەرى ادام قاعىپ ءولتىرىپ، قاشىپ كەتتى

6859
Adyrna.kz Telegram

بۋرابايدا  پوليتسيا قىزمەتكەرى تاعى دا جول اپاتىن جاسادى! بۇل تۋرالى كتك تەلەارناسى حابارلايدى.

جىلدامدىقتى شامادان تىس اسىرعان شەندى ءتارتىپ ساقشىسى بۋرابايعا كىرە بەرىستە ادام قاعىپ كەتكەن. تولەم تەرمينالىنا بارىپ، جولاقىسىن تولەپ تۇرعان كىسى سول جەردە جان ءتاسىلىم ەتتى. سوققىنىڭ قاتتى بولعانى سونشا، مارقۇم 40 مەتردەي ۇشىپ، دەنەسى بولشەكتەنىپ كەتىپتى. ال پوليتسەي وقيعا ورنىنان ءىز سۋىتقان.

نۇرلان ءجۇنىسوۆ تاڭەرتەڭگىسىن ماكينسك قالاسىنا ءىس-ساپارعا كەتكەن. ول كوكشەتاۋداعى ەلەكتر جەلىلەرى تورابىندا باعانالار تاسيتىن جۇك كولىگىنىڭ جۇرگىزۋشىسى. جولدا كولىكتەن ءتۇسىپ تولەم تەرمينالىنا جول اقىسىن تولەمەك بوپ جاقىنداعاندا، جۇيتكىگەن كولىك كەپ سوققان.

مارجانگۇل نۇكەنوۆا، مارقۇمنىڭ قىزى:

- 40-43 مەترگە ۇشىپ كەتكەنىن ايتتى. ۇشقانى سونشالىق، ششۋچەدە سوققاننان كەيىن توقتاماعان، ارى قاراي كەتىپ قالعان. ماس بولعان، ماس بولعان دەيدى، ءيا.

«مۇسىلماندىق جولمەن شاڭىراعىندا ءبىر تۇنەتىپ، ارۋلاپ بارىپ جەرلەي المادىق» - دەپ وكىنەدى تۋىسقاندارى. ويتكەنى مارقۇمنىڭ دەنەسى بولشەكتەنىپ قالعان، ءمايىتحانادان اكەلە ەسىك الدىنان جونەلتكەن. ال وقيعا ورنىنان قاشىپ كەتكەن ماكينسك قالالىق جەلىلىك پوليتسيا بولىمشەسىنىڭ باستىعى ەكەن. باسشىلارى ونى قىزمەتىنەن شىعارىپ ۇلگەرىپتى.

ءلاززات قاسىمجانوۆا، قر ءىىم كولىكتەگى پد ءباسپاسوز حاتشىسى:

- كولىكتەگى پوليتسيا دەپارتامەنتى باستىعىنىڭ اعىمداعى جىلعى 27-مامىرداعى بۇيرىعىمەن ماكينكا ستانتسياسىنداعى جەلىلىك پوليتسيا باستىعى، مايور روللان قانعوجين ىشكى ىستەر ورگاندارىنان شىعارىلدى. سونىمەن قاتار كوكشەتاۋ ستانتسياسىنىڭ جەلىلىك پوليتسيا ءبولىمىنىڭ باستىعى اتقارىپ وتىرعان لاۋازىمىنان بوساتىلدى.

جول اپاتىن جاساپ، ادام ولىمىنە سەبەپشى بولعان بولىمشە باستىعىنىڭ بۇل ارەكەتىنە دەپارتامەنتتىڭ باسشى قۇرام ساناتىنداعى بىرنەشە قىزمەتكەردى دە تارتىپتىك جاۋاپقا تارتقان. قازىر پوليتسيا مايورى قاماۋعا الىنىپ، «جول ەرەجەسىن ورەسكەل بۇزۋ» بابىمەن تەرگەلىپ جاتىر.

ايتا كەتەتىن جايت، روللان قانعوجيندى تەرگەۋ ىسىندە ونىڭ وقيعا ورنىنان قاشىپ كەتكەنى تۋرالى ءبىر اۋىز ءسوز جوق.

پىكىرلەر