جۇماداعى ىزگىلىك

4027
Adyrna.kz Telegram

 مۇحاممەد پايعامبار: "ارايلاپ اتقان كۇندەردىڭ ەڭ قايىرلىسى - جۇما كۇنى. ادام اتا وسى كۇنى جاراتىلدى", دەيدى. جۇما كۇنىنىڭ قادىر -قاسيەتىنە توقتالعان قۇران كارىمدە " جۇما" دەپ اتالاتىن ارنايى سۇرە بار. حاديستەردە جۇما كۇنى جۋىنىپ ، تازارىپ، مەشىتكە بارىپ، ۋاعىز  تىڭداپ، ناماز وقىعان كىسىنىڭ سول كۇن مەن وتكەن جۇما اراسىنداعى بارلىق كۇنالارىنىڭ كەشىرىلەتىنى ايتىلادى.
جۇما كۇنى - كۇندەردىڭ ەڭ ابزالى ءارى مۇسىلمانداردىڭ مەيرامى بولىپ ەسەپتەلىنەدى. سونىمەن قاتار، بۇل كۇنى جۇما نامازى وقىلادى. ەگەر مۇسىلمان بۇل كۇندى جانە جۇما نامازدى قادىرلەپ، ادەپتەرىن ۇستانسا، اللا ونىڭ ساۋابىن ارتتىرىپ، كۇنالارىن كەشىرەدى.

" جاقسىلىققا جاقسىلىق - ءار كىسىنىڭ ءىسى،
جاماندىققا جاقسىلىق - ەر كىسىنىڭ ءىسى"
دەمەكشى بۇگىنگى تاڭدا جاقسىلىق جاساۋعا جانى قۇمار ادامداردىڭ سانى ارتىپ كەلەدى. سولاردىڭ ءبىرى ءوزىمىزدىڭ اقتوبە وبلىسىنداعى قاندىاعاش قالاسىنىڭ قاراپايىم تۇرعىنى - تەمىربەك كۇسايىنوۆ. جانى تازا تەمىربەك مىرزا ءبىرازدان بەرى قالالىق قوعامدىق كولىك جۇرگىزۋشىسى بولىپ جۇمىس ىستەپ  كەلەدى. ەكى  جىلدان بەرى مەيىرىمدى ازامات قالا تۇرعىندارىن ءار جۇما سايىن تەگىن تاسىپ، حالىقتىڭ ىستىق ىقىلاسىنا بولەنىپ ءجۇر. سونداي – اق،  ءار كۇن سايىن " ماناس" ازىق - تۇلىك دۇكەنى ارقىلى 11 بولكە ناندى حالىققا تەگىن تاراتۋدا.
وسىنداي اق،  نيەتى اق ادال جانعا ريزا بولعان تۇرعىندار "جىل ادامى " اتاعىن بەرۋگە ۇسىنىس جاسادى. ەل تىلەگى قابىل بولىپ باسشىلار تاراپىنان ەسكەرىلىپ،  2019 جىلدىڭ 16 جەلتوقسانى كۇنى تەمىربەك داۋرەنبەكۇلىنا " جىل ادامى" اتاعى بەرىلدى.
وسى اتاقتى العاندا قانداي سەزىمدە بولدىڭىز؟ - دەگەندە " مەن نە ىستەسەم دە اللانىڭ رازىلىعى ءۇشىن ىستەيمىن. ادامداردىڭ ريزا بولىپ، جاۋدىرعان العىستارىن ەستىگەندە جۇبايىم ايداي ەكەۋمىز ەت جۇرەگىمىز ەلجىرەپ، باقىتقا بولەنەمىز. شىنىمدى ايتسام، ءار جۇمانى اسىعا كۇتەمىن. ويتكەنى، العىس الۋ - ءبىر عانيبەت" - دەپ اعىنان جارىلدى. وسىنداي ەلگە شاپاعاتىن تيگىزەر ادال دا جومارت ادامدار كوپ بولسىن! «تەمىربەك داۋرەنبەكۇلى، كاسىبىڭىزدەن بەرەكەت تاۋىپ، اللانىڭ نازارىندا جۇرە بەرىڭىز!» دەيمىز شىن جۇرەكتەن.

 

 امانجولوۆا ارۋجان،

اقتوبە وبلىسى

قاندىاعاش قالاسى

11- سىنىپ وقۋشىسى

عىلىمي جەتەكشىسى: 

ابدىجادىلقىزى جيدەگۇل

                                                                                                                                            ف.ع.ك، دوتسەنت

پىكىرلەر