الماتىدا بلوكبەكەتتە ەكى پوليتسەيدى قاعىپ كەتكەن BMW جۇرگىزۋشىسىنە قاتىستى جاڭا دەرەكتەر شىقتى، - دەپ حابارلايدى قالالىق پوليتسيا دەپارتامەنتى.
پوليتسەيلەردىڭ مالىمەتىنشە، جۇرگىزۋشى وسىعان دەيىن 6 جىل قۇقىق قورعاۋ ورگاندارىندا جۇمىس ىستەگەن. الايدا جۇمىستاعى مىندەتتەرىنە نەمقۇرايلى قاراعانى ءۇشىن قىزمەتىنەن بوساتىلعان.
"بلوكبەكەتتە بولعان جاعدايدان بىردەن ەكى پوليتسەي قازا تاپتى. بىراق، ەڭ وكىنىشتىسى، پوليتسەيلەردى قاققان جۇرگىزۋشى وسىعان دەيىن پوليتسيادا 6 جىل جۇمىس ىستەگەن. قىزمەتتىك مىندەتتەرىن دۇرىس ورىنداماعانى ءۇشىن ءتورت رەت تارتىپتىك جازاعا تارتىلعان. وسىعان بايلانىستى ىشكى ىستەر ورگاندارىنداعى قىزمەتىنەن قۋىلعان. زاڭدى بۇزا وتىرىپ، وعان اۋىر جازا قاراستىرىلعانىن بىلە تۇرىپ، ماس كۇيدە رولگە وتىرىپ، قىلمىس جاسادى", - دەدى قالالىق پوليتسيا دەپارتامەنتىنىڭ باسشىسى قانات تايمەردەنوۆ.
ونىڭ ايتۋىنشا، جۇرگىزۋشىگە قاتىستى قر قىلمىستىق كودەكسىنىڭ 99-بابىنىڭ 2-بولىگى بويىنشا سوتقا دەيىنگى تەرگەۋ باستالدى. ەندى ول 15 جىلدان 20 جىلعا دەيىن باس بوستاندىعىنان ايىرىلۋى مۇمكىن.
