قر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ءبولىم باسشىسى الۋا جولدىبالينا مەملەكەت باسشىسى قول قويعان «ساياسي پارتيالار تۋرالى» قر-نىڭ زاڭىنا وزگەرىس پەن تولىقتىرۋلار ەنگىزۋ تۋرالى» قر زاڭىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى. «مەملەكەت باسشىسى قاسىم-جومارت توقاەۆتىڭ 2019 جىلدىڭ 20 جەلتوقسانىندا ايتقان رەفورمالارى 2020 جىلى بەلسەندى جۇزەگە اسىرىلا باستادى جانە سوعان ساي جەدەل ءارى ساپالى زاڭ جوبالارىن ازىرلەۋ تالاپ ەتىلدى. ەكونوميكالىق، الەۋمەتتىك جانە ساياسي سالالارداعى رەفورمالار حالىقتىڭ كەڭ اۋقىمىنىڭ سۇرانىستارى مەن مۇددەسىن كورسەتىپ وتىر. وسى ورايدا الەۋمەتتىك جانە ساياسي اسپەكتىلەر باعىتىنداعى رەفورمالار مەملەكەتتىك ساياساتتى ىرىقتاندىرۋ پروتسەسىن ساپالى تولىقتىرا تۇسۋدە»، -دەدى ول.
ونىڭ اتاپ وتۋىنشە، دەموكراتيالىق قوعامدى دامىتۋ ەڭ الدىمەن پىكىر اشىقتىعى مەن الۋاندىعىن كوزدەيدى. بۇل رەتتە قازاقستاندىق قوعامدا ازاماتتىق قوعامدىق دامىتۋ ءۇشىن بارلىق جاعداي جاسالعان. وعان ۇكىمەتتىك ەمەس ۇيىمداردىڭ، تاۋەلسىز بۇقارالىق اقپارات قۇرالدارىنىڭ كوپتىگى دالەل بولا الادى.
«وسىلايشا، ءبىزدىڭ قوعام ەل پارلامەنتىندە بولۋى ءتيىستى قۋاتتى ءارى بەدەلدى ساياسي ازشىلىقتى تابيعي جولمەن قۇرۋ كەزەڭىنە بىرتىندەپ كەلە جاتىر. قازىرگى ۋاقىتتا ساياسي پارتيالار مەن ساياسي قىزمەتتىڭ ءوزى بۇكىل الەمدە تۇبەگەيلى وزگەرىسكە ۇشىراۋ ۇستىندە. سوڭعى جىلدارى ساياسي كونيۋنكتۋرانىڭ جانە قوعامدىق دامۋ ترەندتەرىنىڭ اقپاراتتىق-كوممۋنيكاتسيالىق كەڭىستىك اياسىندا وزگەرىسكە ۇشىراۋى پارتيالىق قۇرىلىم فورماتىن وزگەرتۋ، ونىڭ ىشىندە يدەولوگيالىق پلاتفورمانى جاڭعىرتۋ، پارتيانىڭ ەلەكتوراتتارمەن ءوزارا ءىس-قيمىل فورماتىن وزگەرتۋ، قارجىلاندىرۋدىڭ وزگە كوزدەرىن ىزدەۋ قاجەتتىلىگىنە بايلانىستى بولا ءتۇستى»، - دەدى ساراپشى.
ءبولىم باسشىسىنىڭ اتاپ وتۋىنشە، بۇگىندە قازاقسانداعى ءاربىر ساياسي پارتيا جاقتاستارى قاتارىن ارتتىرۋ باعىتىندا جۇمىستى كۇشەيتە تۇسۋدە. ال بۇل رەتتە ساياسي پارتيالاردىڭ مەملەكەتتىك تىركەۋدەن ءوتۋى ءۇشىن شەكتى دەڭگەيدى 20 مىڭ مۇشەگە دەيىن تومەندەتۋى ساياسي پارتيالاردىڭ رەسۋرستىق بازاسىن كەڭەيتە تۇسەدى، ساياسي پارتيالاردىڭ قالىپتاسۋىنا جاعداي جاسايدى. مۇنان بولەك، قوعامداعى ازاماتتىق بەلسەندىلىكتى ارتتىرا تۇسەدى.
"قازاقپارات".
