«قىرىققاباتتى كومۋگە 2 ملرد تەڭگە جۇمساعان ۇكىمەتتە فانتازيا جوق»

2103
قازاقستاننىڭ العاشقى پرەمەر-ءمينيسترى بولعان سەرگەي تەرەششەنكو مۇنايدى ازىق-تۇلىكپەن الماستىراتىن ۋاقىت جەتكەنىن ايتتى.
«قازاقستاننىڭ اگروونەركاسىپتىك كەشەنىن دامىتۋدىڭ بولاشاعى» تۋرالى ونلاين-كونفەرەنتسيادا ومارتاشىلار وداعىنىڭ پرەزيدەنتى سەرگەي تەرەششەنكو قازاقستانداعى ازىق-تۇلىك ونىمدەرىن ءوندىرۋ، ساقتاۋ جانە ونى ىشكى/سىرتقى نارىقتارعا ساتۋ جۇيەسىنە تومەن باعا بەردى. كەزىندە مينيسترلەر كابينەتىن باسقارعان تەرەششەنكو ۇكىمەت بۇل جۇيەنى ابدەن قۇلدىراتىپ جىبەرگەنىن دە مويىندادى.

ونىڭ ايتۋىنشا، 300 مىڭ توننا قىرىققاباتتى ىشكى نارىققا وتكىزە الماعان ۇكىمەت ءشىرىپ كەتكەن ءونىمدى كومۋ ءۇشىن 2 ملرد تەڭگە قارجى جۇمساعان.

«ءوندىرۋ جانە ساتۋ نارىقتارىنىڭ جۇيەسىن جاقسىلاپ تۇرىپ ءبىر ىزگە ءتۇسىرۋ كەرەك. جۇيەنىڭ تەرىستىگىن مىنادان بايقاۋعا بولادى: جۋىردا وڭتۇستىكتە 300 مىڭ توننا قىرىققابات بۇزىلىپ كەتتى. ونى كومۋ ءۇشىن ۇكىمەت 2 ملرد دوللار ءبولدى. قىرىققاباتتى اكەلىپ، ەلىمىزدىڭ باسقا قالالارىنا تەگىن تاراتۋعا ەشكىمنىڭ فانتازياسى جەتپەدى»، - دەيدى تەرەششەنكو.

ەكس-پرەمەر ازىرگە ەلىمىزدە ءوسىرۋ-ساقتاۋ-ساتۋ جۇيەسىندە وتكىزۋ ماسەلەسى دۇرىس جولعا قويىلماعانىن ايتتى.

«مەنىڭ تۇرگەندە تۇراتىن دوسىم بار، ءوز اۋلاسىندا قۇلپىناي وسىرەدى، وتە ءدامدى. ياعني، شاعىن فەرمەرلەردىڭ ءوزى كەز كەلگەن اۋىل شارۋاشىلىق ءونىمىن وسىرە الادى. قازىر قازاقستان ءۇشىن ونى ساقتاۋ، ساتۋ ماڭىزدى. مىسالى، ءبىز بال شىعارامىز. سۇلتانوۆ مىرزا (ساۋدا جانە ينتەگراتسيالار ءمينيسترى باقىت سۇلتانوۆ – اۆت.) السىن دا، بالدى سول ساتسىن. ءبىزدىڭ ساۋدا-ساتتىقتاعى ستاندارتتارىمىز الەمدىك ستاندارتقا جاتادى. ياعني، قازىر الەم بويىنشا مۇناي باعاسى تۇسكەن كەزدە، قازاقستان مۇنايدى نەمەن الماستىرۋ كەرەك ەكەنىن ءتۇسىنۋ كەرەك. ال، مۇنايدىڭ ورنىنا ءبىز اۋىل شارۋاشىلىعى ونىمدەرىنىڭ كوپ ءتۇرىن ساتا الامىز»، - دەدى ول.

قازاقستاننىڭ اۋىل شارۋاشىلىعى ونىمدەرىن ساقتاۋ جانە ساتۋ نارىعى 90-شى جىلدارى «قازاقستاننىڭ تۇتىنۋ وداعى» سياقتى قۇرىلىمداردان باستالعان. سەرگەي تەرەششەنكو ءوزى پرەمەر-مينيستر بولعان كەزدە ۇكىمەت بۇل جۇيەنى نازارىنان تىس قالدىرىپ الدى دەيدى. ەندىگى مىندەت – ول جۇيەنى قازىرگى زاماننىڭ تالابىنا ساي قايتا جاساۋ.

سەرگەي تەرەششەنكو 1991-1994 جىلدار ارالىعىندا تاۋەلسىز قازاقستاننىڭ العاشقى پرەمەر-ءمينيسترى قىزمەتىن اتقاردى. قازىر ول ساياساتتانۋشى، رەسمي تۇردە ومارتاشىلار وداعىنىڭ پرەزيدەنتى.

ەستەرىڭىزگە سالا كەتەيىك، 28 ساۋىردە تۇركىستان وبلىسىنىڭ اكىمى ومىرزاق شوكەەۆ ايماق شارۋالارى 250 مىڭ توننا ورامجاپىراقتى وتكىزە الماي وتىرعانىن ايتىپ، كومەك سۇراعان.

كەنجەكەي توقتامۇرات،

نۇر-سۇلتان

پىكىرلەر
رەداكتسيا تاڭداۋى