مەملەكەت باسشىسى قاسىم-جومارت توقاەۆ بەلگىلى جۋرناليست، «جەتىسۋ» تەلەارناسىنىڭ ديرەكتورى بەيسەن قۇرانبەكتىڭ قايتىس بولۋىنا بايلانىستى ونىڭ وتباسى مەن جاقىن تۋىستارىنا كوڭىل ايتىپ، جەدەلحات جولدادى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي ءوزىنىڭ فەيسبۋك پاراقشاسىندا جازدى.
«بەلگىلى جۋرناليست، تانىمال تەلەجۇرگىزۋشى بەيسەن قۇرانبەكتىڭ دۇنيەدەن وتۋىنە بايلانىستى اۋىر قايعىلارىڭىزعا ورتاقتاسىپ، كوڭىل ايتامىن. بەيسەن قۇرانبەك قازاق جۋرناليستيكاسىندا وزىندىك ورنى بار، كاسىبي قولتاڭباسىن قالىپتاستىرعان ازامات ەدى. «قازاقستان» ۇلتتىق تەلەارناسىنداعى «ايتۋعا وڭاي»، «قارەكەت» باعدارلامالارىن جۇرگىزىپ، ەلدىڭ ىستىق ىقىلاسىنا بولەندى، حالىقتىڭ العىسىن الدى. ول الماتى وبلىستىق «جەتىسۋ» ارناسىنىڭ ديرەكتورى رەتىندە بىلىكتى باسشى، ۇتقىر ۇيىمداستىرۋشى ەكەنىن دە كورسەتە ءبىلدى. مارقۇمنىڭ توپىراعى تورقا، جاتقان جەرى جايلى، يمانى سالامات بولسىن!»، – دەلىنگەن جەدەلحاتتا.
