دۇنيەجۇزىلىك بانك COVID-19 پاندەمياسىنا قارسى قاراجاتتى تەز ارادا جۇمىلدىرا ءبىلدى. ورتالىق ازيا مەملەكەتتەرىنىڭ ۇكىمەتتەرىمەن بىرگە ءبىز دەنساۋلىق ساقتاۋ جۇيەسىن نىعايتىپ، COVID-19 اۋرۋىنىڭ ەكونوميكالىق ىقپالىن ازايتۋ ماقساتىندا قوسىمشا قاراجات ءبولۋ ءۇشىن 9,7 ملرد اقش دوللارىن قۇرايتىن ايماقتاعى ينۆەستيتسيالىق پورتفەلىمىزدى قايتا قاراپ جاتىرمىز، - دەدى دۇنيەجۇزىلىك بانكتىڭ ورتالىق ازياداعى ايماقتىق ديرەكتورى ليليا بۋرۋنچۋك ونلاين بريفينگتە.
ونىڭ ايتۋىنشا، بۇل قاراجات مەديتسينالىق جابدىقتاردى، ياعني تەستىلەۋ جيىنتىقتارىن، لابوروتوريالىق رەاگەنتتەردى، رەانيماتسيا بولىمشەلەرىنە ارنالعان جەكە قۇرالداردى، مەديتسينالىق قىزمەتكەرلەرگە ارنالعان جەكە قورعانىس قۇرالدارىن ساتىپ الۋعا جۇمسالادى.
سونىمەن بىرگە ورتالىق ازيانىڭ جەكەلەگەن ەلدەرىنىڭ باسىمدىعىنا قاراي قاراجات ۇكىمەتتەرگە حالىقتىڭ ءالسىز توپتارىن الەۋمەتتىك تۇرعىدا قورعاۋدى قامتاماسىز ەتەتىن باعدارلامالاردى كەڭەيتۋگە، قاشىقتىقتان ءبىلىم بەرۋ جۇيەسىن رەتكە كەلتىرۋگە جانە پاندەميا سالدارىن ازايتۋ اياسىندا باسقا ماسەلەلەردى شەشۋگە جول اشادى.
2020 جىلدىڭ 14 مامىرىنداعى جاعداي بويىنشا دۇنيەجۇزىلىك بانكتىڭ ورتالىق ازياداعى COVID-19 اسەرىن ازايتۋعا باعىتتالعان شارالار پاكەتى بەكىتىلدى. قازاقستانعا ايماقتاردا ىندەت جۇقتىرعان ناۋقاستاردى ەمدەۋ ءۇشىن وكپەنى جاساندى جەلدەتەتىن 236 اپپارات ساتىپ الۋعا 10 ملن دولل. ءبولىندى. بۇعان قوسا وكپەنى جاساندى جەلدەتەتىن 123 اپپارات پەن وزگە دە مەديتسينالىق جابدىقتى ساتىپ الۋعا 17 ملن دوللار اۋدارىلدى.
بانك دەنساۋلىق ساقتاۋ جۇيەسىن جاقسارتۋعا تاجىكستانعا 11,3 ملن دوللار، ال قىرعىز رەسپۋبليكاسىنا 21 ملن دوللار اۋدارسا، وزبەكستانعا 95 ملن دوللار اۋداردى. سونداي-اق دۇنيەجۇزىلىك بانك سالىق تۇسىمدەرىنىڭ ەداۋىر قىسقارىپ، ۇكىمەتتىڭ پاندەميانىڭ الەۋمەتتىك-ەكونوميكالىق سالدارىن جۇمسارتۋ باعدارلاماسى اياسىندا شىعىستاردىڭ كۇتپەگەن جەردەن ۇلعايۋى جاعدايىن ەسكەرە وتىرىپ، بيۋدجەتتى قوسىمشا قارجىلاندىرۋ ءۇشىن تاعى 200 ملن دوللار ءبولدى. سونىمەن قاتار، وزبەكستانداعى شۇعىل مەديتسينالىق كومەك جۇيەسىن جەتىلدىرۋ جوباسى اياسىندا 17 ملن دوللار اۋداردى.
ورتالىق ازيا ەلدەرىنە ىندەتتىڭ جاعىمسىز ەكونوميكالىق سالدارىن ازايتۋعا كومەكتەسۋ ءۇشىن دۇنيەجۇزىلىك بانك ايماقتىڭ ۇكىمەتتەرىمەن بىرلەسىپ، جاعدايدى باعالاي وتىرىپ، رەسۋرستاردى قايتا ءبولۋ جانە قايتا ۇيىمداستىرۋ ماقساتىندا جوبالاردىڭ ءبارىن زەرتتەيدى. دۇنيەجۇزىلىك بانك ۇلتتىق ەكونوميكالاردى قالپىنا كەلتىرۋ ءۇشىن قوسىمشا قاراجاتتى جۇمىلدىرۋدى جوسپارلاپ وتىر. ونىڭ كومەگى حالىقتىڭ تابىسىن قولداۋعا، مال شارۋاشىلىعى مەن اۋىل شارۋاشىلىعىن دامىتۋعا، الەۋمەتتىك قورعاۋ قىزمەتتەرىن كورسەتۋگە، تسيفرلىق ەكونوميكانى دامىتۋعا، اقپاراتتىق دەرەكتەردى باسقارۋعا باعىتتالادى.
