بۇگىن شىمكەنت قالاسىنىڭ اكىمى مۇرات ايتەنوۆ قاتتى جاۋىن-شاشىن سالدارىنان سۋ باسقان ەلتاي ەلدىمەكەنىنە بارىپ، جاعداي بارىسىمەن تانىستى. سۋ شايعان جەرلەردى ارالاپ كورگەن قالا اكىمى تەز ارادا وسى سالاعا جاۋاپتى ورىنباسارىنىڭ توراعالىعىمەن تاسقىن زارداپتارىن جويۋ جانە الدىن الۋ جۇمىستارى جونىندە ارنايى كوميسسيا قۇرۋدى تاپسىردى.
مامانداردىڭ پىكىرىنە سۇيەنە الداعى ءۇش كۇندە تولاسسىز جاۋىن-شاشىننىڭ بولاتىنىن ايتقان مۇرات دۇيسەنبەكۇلى، تابيعاتتىڭ توسىن مىنەز تانىتۋىنا قارسى شارالار مەيلىنشە كۇشەيتىلۋىن قاتاڭ باقىلاۋعا الۋدى مىندەتتەدى. سونىمەن قاتار اكىم جاۋىننان كەلەتىن قاۋىپتى الدىن الا بولجاي الماعان جاۋاپتى لاۋازىمدى ازاماتتارعا ءتيىستى شارا قولدانىلاتىنىن ءمالىم ەتتى.
ايتا كەتەيىك، كەشە ساعات 19.14-تە شىمكەنت قالاسى ەڭبەكشى اۋدانى، ەلتاي ەلدى مەكەنىنە قاتتى نوسەر سالدارىنان تۇركىستان وبلىسى تولەبي اۋدانىنان سەكۋندىنا 3-5 تەكشە مەتر سۋ كەلگەن. سۋدىڭ دەڭگەيى 20-50 سم شاماسىندا بولان. كوپ مولشەردە كەلگەن سۋدان ارىق ارناسىنان اسىپ، سونىڭ سالدارىنان تۇرعىن ۇيلەردىڭ اۋلالارىن سۋ باسقان.
14.05.2020 جىلى ساعات 12-00-دەگى جاعداي بويىنشا اتالعان ەلدىمەكەكەندە جاۋىن-شاشىن سالدارىنان 60 اۋلا ۋچاسكەسى مەن 60 شارۋاشىلىق قۇرىلىستارىن (سۋ دەڭگەيى 20-50 سم) سۋ باستى، ونىڭ ىشىندە 24 تۇرعىن ءۇيدى سۋ باسقان، 5 شارۋاشىلىق نىسان قيراعان.
وندا قازىر قالا اكىمىنىڭ تاپسىرماسىمەن تج سالدارىن جويۋ بويىنشا تجد جەدەل شتابى قۇرىلعان. تجد، سونداي-اق №6506 ءا/ب كۇشىمەن (قازىرگى ۋاقىتتا 7000 م3 سۋ سورىلدى) كانالداردى تازالاۋ، تەرەڭدەتۋ جانە ارنانى تۇزەتۋ جۇمىستارى جۇرگىزىلدى.
سۋ باسۋ ايماعىنان 300 ادام (124 بالا) ەۆاكۋاتسيالاندى، ونىڭ ىشىندە 294 ادام تۋىسقاندارىنا جانە 6 ادام №119 وم بازاسىندا ەۆاكۋاتسيالىق پۋنكتكە ورنالاستىرىلدى. وقيعا ورنىندا 4 قوسالقى ەۆاكۋاتسيالىق پۋنكت دايىندالدى (№ 97, 105, 120, 126 وم). سونداي-اق تجد (133 قىزمەتكەر، 10 بىرلىك تەحنيكا جانە 19 موتوپومپا), جاو (46 قىزمەتكەر، 31 بىرلىك تەحنيكا), 6506 اسكەري ءبولىمى (100 قىزمەتكەر، 4 بىرلىك تەحنيكا) جۇمىلدىرىلدى.
شىمكەنت
