ەندى قازاقستاندىق جاستار وقۋىن بىتىرگەننەن كەيىن ءۇش جىل اۋىلدا ىستەيدى

 پەداگوگيكا، مەديتسينا، ۆەتەريناريا جانە اۋىل شارۋاشىلىعى ماماندىقتارى بويىنشا كۆوتامەن ءبىلىم العان اۋىل جاستارى وقۋىن تامامداعاننان كەيىن ءۇش جىل اۋىلدا جۇمىس ىستەۋگە مىندەتتەلدى.

ءتيىستى قاۋلىعا ۇكىمەت باسشىسى اسقار مامين قول قويدى. قاۋلى پرەمەر-ءمينيستردىڭ رەسمي سايتىندا جاريالانعان.

"پەداگوگتىك، مەديتسينالىق، ۆەتەريناريالىق جانە اۋىل شارۋاشىلىعى ماماندىقتارى بويىنشا اۋىل جاستارى قاتارىنان شىققان ازاماتتارعا بەرىلەتىن كۆوتا شەگىندە وقۋعا تۇسكەن ازاماتتار جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمىن بىتىرگەننەن كەيىن، كەمىندە ءۇش جىل اۋىلدىق جەردە ورنالاسقان مەملەكەتتىك ءبىلىم بەرۋ ۇيىمدارىندا، مەملەكەتتىك مەديتسينا ۇيىمدارىندا، ۆەتەريناريا سالاسىنداعى قىزمەتتى جۇزەگە اسىراتىن مەملەكەتتىك ورگاندار بولىمشەلەرىندە، مەملەكەتتىك ۆەتەريناريا ۇيىمدارىندا جانە مەنشىك نىسانىنا قاراماستان، اگرارلىق بەيىندەگى ۇيىمداردا جۇمىسىن وتەيدى", - دەلىنگەن قۇجاتتا.

سونىمەن قاتار، ءۇش جىل اۋىلدا جۇمىس ىستەۋ جونىندەگى مىندەتكە قاتىستى وزگەرىستەر ەنگىزىلدى.

قاۋلىدا اۋىلدا جۇمىس ىستەۋ مىندەتى قاي كەزدە توقتاتىلاتىنى كورسەتىلگەن:

• ءبىلىم الۋشى (جاس مامان، فيلوسوفيا دوكتورى (رhD)) قايتىس بولسا، ءتيىستى قۇجاتتارمەن راستالۋى ءتيىس;
• جۇمىس ىستەپ جۇرگەن كەزىندە I جانە II توپ مۇگەدەكتىگى بەرىلسە;
• زاڭدا جانە وسى قاعيدالاردىڭ 27-تارماعىندا كوزدەلگەن جاعدايلاردا.

ولار بيۋدجەت قارجىسى ەسەبىنەن جۇمسالعان شىعىنداردى قايتارمايدى.

Sputnik