تۇركىستان وبلىسىنداعى سۋ تاسقىنى ەلىمىزدى ەسەڭگىرەتىپ تاستادى. كەشەلى بەرى ايماقتىڭ رەسمي ورىندارى مەن ازاماتتارى وقيعاعا قاتىستى ءارتۇرلى دەرەكتەر ايتۋدا. 800-گە جۋىق مال شىعىنى بار ەكەن. جەلىدەگى ۆيدەودا وزبەكستان ازاماتتارىنىڭ سۋدى قازاقستانعا قاراي بۇرىپ جاتقانىن انىق كورسەتەدى.
وبلىستىڭ رەسمي اقپاراتتىق رەسۋرسىندا مال شىعىنى تۋرالى ايتىلمايدى. بىراق كوپتەگەن جۇمىستاردىڭ اتقارىلىپ جاتىر.
«قازىرگى تاڭدا تۇركىستان وبلىسى ماقتاارال اۋدانىنىڭ 4 ەلدىمەكەنى: جاڭا-تۇرمىس (46 ءۇي), جەڭىس (130 ءۇي), فيردوۋسي (250 ءۇي) جانە ورگەباس (194 ءۇي) سۋ استىندا قالعان. جالپى قىزىل سۋدان 620 ءۇي جاپا شەككەن. تۇرعىنداردى كوشىرۋ ءۇشىن 22 ەۆاكۋاتسيالىق ورىن دايارلانعان. بۇگىنگى كۇنگە بۇل ورىندارعا ورنالاسقان ادام سانى 7000 -عا جۋىق.
ەۆاكۋاتسيالىق بولىمدەردە تۇرعىنداردى120 مەديتسينا قىزمەتكەرلەرى تەكسەرۋدەن وتكىزۋدە. پوليتسيا قىزمەتكەرلەرى جەڭىس، جاڭا-تۇرمىس، فيردوۋسي، ورگەباس ەلىمەكەندەرىنە 5 بلوك-بەكەت قويىپ، قاۋىپسىزدىكتى قامتاماسىز ەتۋدە.
سونىمەن قاتار، كورشىلەس جەتىساي اۋدانى، قوعالى ەلدىمەكەنىندە قاۋىپسىزدىكتى كۇشەيتۋ ماقساتىندا 5 تەحنيكا، 508 ادام جۇمىلدىرىلعان.
جاعداي تۇراقتى باقىلاۋدا، بارلىق قاجەتتى كومەك ۋاقىتىلى كورسەتىلۋدە»، دەيدى وبلىستىق ءباسپاسوز قىزمەتى.
ال سول وڭىردەگى ءتىلشىمىزدىڭ ايتۋىنشا، ايماقتا 800-گە جۋىق مالدىڭ ولگەنى ايتىلادى.
«وبلىستىق اۋىل شارۋاشىلىعى باسقارماسى ماماندارى جۇرگىزگەن زەردەلەۋ جۇمىستارى بارىسىندا سۋ تاسقىنى كەزىندە جاڭا جول مەن ەڭبەكشى اۋىلدىق وكرۋگتەرىندەگى 3 ەلدىمەكەندە 1682 گەكتار اۋىل شارۋاشىلىعى داقىلدارىنىڭ بۇلىنگەنى انىقتالىپ وتىر. الدىن الا بولجامدىق ەسەپ بويىنشا مۇنىڭ شىعىنى -181,1 ميلليون تەڭگەنى قۇرايدى. اتاپ ايتقاندا، 1480 گەكتار ماقتا -148 ميلليون تەڭگە، 42 گەكتار جوڭىشقا - 2,1 ميلليون تەڭگە، 150 گەكتار باقشا - 30 ميلليون تەڭگە، 10 گەكتار جۇگەرى - 1 ميلليون تەڭگە دەپ ەسەپتەلىپ وتىر. سونداي-اق، اتالعان 4 ەلدىمەكەندە 5335 مال باسى تىركەلسە، ونىڭ ىشىندە 799 مال ولگەن. ونىڭ 328-ءى ءىرى قارا، 361-ءى ۇساق مال، 53-ءى جىلقى، 57-ءسى تۇيە. مالدىڭ جالپى شىعىنى 249 ميلليون تەڭگەنى شاماسىندا» - دەگەن مالىمەت جەتكىزدى.
اراي اۋىلىنىڭ تۇرعىندارى اكىمدىگىنە ريزا ەمەس. تەحنيكانى سولياركامەن قامتاماسىز ەتە المايدى دەپ اشىنادى.
وزبەكستاننىڭ الەۋمەتتىك جەلى قولدانۋشىسىنىڭ ۆيدەوسىنان سۋدى قازاقستانعا بۇرىپ جاتقانىن كورۋگە بولادى.
