تاجىكستاندا ازاماتتاردىڭ تەگىن "-وۆ/-وۆا" جانە "-ۆيچ/-وۆنا" جۇرناقتارىمەن ورىسشالاۋعا تىيىم سالىندى. زاڭ ەرەجەسى ەلدەگى از ۇلت وكىلدەرىنە جۇرمەيدى.
تاجىكستاننىڭ تومەنگى پالاتاسى 28 ساۋىردە وسىنداي قاۋلى قابىلدادى. مۇنداي زاڭ ۇلتتىق ەرەكشەلىكتى قورعاۋ ماقساتىندا قابىلداندى.
زاڭ جوباسىن پارلامەنتكە ەلدىڭ ادىلەت ءمينيسترى مۇزاففار اشۋريون تانىستىردى. ونىڭ ايتۋىنشا، ازاماتتار تىيىم سالىنعان ورىسشا جۇرناقتاردىڭ ورنىنا تاجىكشە "-زودا", "-يون" جانە باسقا دا جۇرناقتاردى قولدانا الادى. ەلدەگى ورىستار مەن باسقا از ۇلتتاردىڭ وكىلدەرىنە "-وۆ/-وۆا", "-ۆيچ/-وۆنا" جۇرناقتارىن قولدانۋعا رۇقسات. ەسكە سالايىق، تاجىكستاندا سەكسەننەن استام ۇلت تۇرادى.
مۇنداي ەرەجە ازاماتتاردىڭ تولقۇجاتتارىن وزگەرتكەندە نەمەسە جاڭادان العاندا ساقتالۋى ءتيىس.
"جاڭا تۋعان سابيلەردىڭ كۋالىگىندە "پۋردۋحت", "ي", "زود", "زودا", "ون", "يون", "يون", "نيور", "فار" جۇرناقتارى قولدانىلادى", - دەپ ءتۇسىندىردى اشۋريون.
2007 جىلى تاجىكستان پرەزيدەنتى راحمونوۆ ەمومالي شاريپوۆيچ اتى-ءجونىن ەمومالي راحمون دەپ وزگەرتتى. سودان كەيىن ەلدەگى شەنەۋنىكتەر مەن كوپتەگەن ازامات تەگىن تاجىكشە جۇرناقتاردىڭ كومەگىمەن وزگەرتە باستادى.
