Tájikstanda azamattardyń tegin "-ov/-ova" jáne "-vıch/-ovna" jurnaqtarymen orysshalaýǵa tyıym salyndy. Zań erejesi eldegi az ult ókilderine júrmeıdi.
Tájikstannyń tómengi palatasy 28 sáýirde osyndaı qaýly qabyldady. Mundaı zań ulttyq erekshelikti qorǵaý maqsatynda qabyldandy.
Zań jobasyn parlamentke eldiń ádilet mınıstri Muzaffar Ashýrııon tanystyrdy. Onyń aıtýynsha, azamattar tyıym salynǵan oryssha jurnaqtardyń ornyna tájikshe "-zoda", "-ııon" jáne basqa da jurnaqtardy qoldana alady. Eldegi orystar men basqa az ulttardyń ókilderine "-ov/-ova", "-vıch/-ovna" jurnaqtaryn qoldanýǵa ruqsat. Eske salaıyq, Tájikstanda seksennen astam ult turady.
Mundaı ereje azamattardyń tólqujattaryn ózgertkende nemese jańadan alǵanda saqtalýy tıis.
"Jańa týǵan sábılerdiń kýáliginde "pýrdýht", "ı", "zod", "zoda", "on", "ıon", "ııon", "nııor", "far" jurnaqtary qoldanylady", - dep túsindirdi Ashýrııon.
2007 jyly Tájikstan prezıdenti Rahmonov Emomalı Sharıpovıch aty-jónin Emomalı Rahmon dep ózgertti. Sodan keıin eldegi sheneýnikter men kóptegen azamat tegin tájikshe jurnaqtardyń kómegimen ózgerte bastady.
