2020 جىلدىڭ 17 ساۋىرىنەن باستاپ قوستاناي وبلىسىنىڭ اۋماعىندا كارانتين رەجيمى ەنگىزىلگەنى بەلگىلى. وسىعان بايلانىستى قوستاناي وبلىستىق پوليتسيا دەپارتامەنتىنىڭ جەدەل ارەكەت ەتۋ ارنايى جاساعى (جقاج) قيىن جاعدايداعى كوپ بالالى وتباسىلارعا كومەك قولىن سوزدى. بۇل تۋرالى قازاقپارات حابارلادى.
ءتارتىپ ساقشىلارى ازىق-تۇلىك جانە ءدارى-دارمەكتەر ساتىپ الىپ بەردى. وبلىس ورتالىعىنىڭ تۇرعىنى ءاليا شاعىن عانا ۇيدە ءبىر ءوزى بەس بالانى تاربيەلەپ وتىر. ەڭ كىشى بالاسى – 5, ۇلكەنى – 12 جاستا. پوليتسەيلەر نەگىزگى ازىق-تۇلىك ساناتىنا كىرەتىن تاۋارلاردان تىس، جەمىس-جيدەك، كوكونىس، جارما جانە ءتاتتى تاعامدار اپاردى. ءدارىحانادان جوتەلگە قارسى سيروپتار، ۆيتاميندەر جانە بالالاردىڭ ىستىعىن تۇسىرەتىن دارىلەر الدى.
«ءبىز قازىر ناقتى كومەككە مۇقتاج وتباسىلارعا كومەك كورسەتەمىز. ولارعا وسى ساتتە قيىن ەكەنىن بىلەمىز. ءبىر ايەل بەس بالانى تاربيەلەپ جاتقانىن بىلگەننەن كەيىن، ارىپتەستەرىم كومەك كورسەتۋگە قۋانا ءۇن قوستى. دەپارتامەنت باسشىلىعىنىڭ باستاماسىمەن قازا تاپقان قىزمەتكەرلەردىڭ جەسىرلەرىنە، جالعىز باستى انالارعا، كوپ بالالى وتباسىلارعا، سونداي-اق بالالار ءۇيىنىڭ تاربيەلەنۋشىلەرىنە ۇنەمى كومەك كورسەتىپ، قايىرىمدىلىق اكتسيالارعا قاتىسامىز. بۇل يگى ءىس جالعاسا بەرەدى»، - دەپ اتاپ ءوتتى جقاج كومانديرى، پوليتسيا مايورى جانىبەك مۇحامەدجانوۆ.
"ادىرنا" ۇلتتىق پورتالى
