ءومىر ءبىر ورىندا تۇرمايدى. قيىن ساتتەر ساياساتكەردىڭ كىم ەكەنىن دە كورسەتەرى انىق.
ءوز باسىم تەلەگرامداعى وزبەكستاننىڭ 10 مىڭ ادامدىق اۋرۋحانا سالىپ جاتقان قۇرىلىس نىسانىنان حابار تاراتىپ وتىراتىن كانالىنا جازىلىپ قويعانمىن. ودان بولەك ۋكراينا مەن وزبەكستان باق-تارىن ءجيى ساراپتاپ وتىرامىن.
وزبەكستاندا اۋرۋحانا سالۋدى بوس جەردى تەگىستەپ، اسفالت توسەپ، كادىمگى پوەزبەن جۇك تاسۋعا ارنالعان ۆاگونداردى ورناتىپ، ارلەپ-ساندەپ سالىپ جاتقانىن كۇن سايىن تاراتىپ وتىرادى.
ۋكراينادا جاعداي مۇشكىل. بيۋدجەتتە اقشا جوق. ەل دەفولتتىڭ الدىندا تۇر. پرەزيدەنت زە 10 ملرد دوللار حۆق مەن دب-تەن كرەديت الۋ ءۇشىن جانتالاسۋدا. وپپوزيتسيا پرەزيدەنتتى قيىن ساتتە ودان ارمەن باتىرعىسى كەلىپ، ول ۇسىنعان رەفورمالاردىڭ جولىن بوگەۋدە. وليگارحتار پرەزيدەنتتى قولداماي، ءوز ساياساتىن جۇرگىزىپ جاتقانى بايقالادى. بۇل ۋكراينا قوعامىندا دا اشىق ايتىلا باستادى.
بارلىق نارسە سالىستىرۋدان كەلىپ شىعادى. ءبىر مەزگىلدە ءبىزدىڭ ەلدە نە ىستەلىپ جاتقانى دا كوز الدىمىزدا. قازاقستان اۋىرعان ادامدارعا ەم كورسەتۋ ءۇشىن اۋرۋحانا مەن جاتىن ورىندار ماسەلەسىن شەشۋ ماقساتىندا كەلەسى قادامدارعا باردى:
1. اۋرۋحانالار جەتپەگەن جاعدايدا جانە كوروناۆيرسپەن اۋىرعاندارعا جەكە ەم كورسەتۋ ماقساتىندا بيزنەسمەندەردىڭ جەكە-مەنشىك دايىن قوناق ۇيلەرىن مەملەكەت ارنايى جابدىقتاۋدان وتكىزىپ، ەمحاناعا اينالدىردى. بۇلاردىڭ كوبى 4-5 جۇلدىزدى قوناق ۇيلەر. اۋىرعان ادامنىڭ ەم-دوم الۋ جاعدايى ۆاگوننان جاسالعان اۋرۋحانا مەن ارنايى جابدىقتالعان قوناق ۇيدە ەكى ءتۇرلى بولاتىنى بەلگىلى.
2. حالىق تىعىز ورنالاسقان استانا، الماتى مەن شىمكەنتتە 200 ورىندىق ارنايى اۋرۋحانالار سالىنا باستادى. قۇرىلىس مەرزىمى 2-3 اپتا. ونىڭ العاشقىسى استانادا ىسكە قوسىلىپ، اشىلۋىنا پرەزيدەنت ارنايى باردى. ءبىر ەرەكشەلىگى بۇل اۋرۋحانالاردى ىندەت بىتكەننەن كەيىن دە پايدالانا بەرۋگە بولادى.
3. ساپاسى جوعارى. ەلگە تانىمال "BI Group" كومپانياسى سالىپ، اۋديتتەن وتكىزۋدى حالىقارالىق كومپانيا "Deloitte" جۇرگىزدى.
4. 42 500 تەڭگە ءبىراز ايقاي-شۋ بولسا دا وسى كومەك 3,6 ملن ەل ازاماتتارىنا تاعايىندالدى. توتەنشە جاعداي قانشا ۋاقىتقا سوزىلسا تىزىمگە ىلىنگەن ازاماتتار بۇل كومەكتى سونشا ۋاقىت الاتىن بولادى. كورشى ەلدەردە مۇنداي قادامدار جوق.
5. وزبەكستان ۆيرۋسپەن كۇرەسۋشى دارىگەرلەرگە ارنايى وتەماقى تاعايىندادى. ارتىنشا مۇنى پرەزيدەنت شەشىمىمەن قازاقستان دا جاسادى. سونىمەن قاتار قازاقستاندا دارىگەرلەر سالىق پەن الەۋمەتتىك تولەمدەردەن دە بوساتىلدى.
6. حالىقارالىق دەڭگەيدە قازاقستان قىرعىزستان ازاماتتارىن شەتەلدەن ەلگە اكەلۋدە ءوز كومەگىن كورسەتتى. ەۋرازيالىق وداق پرەزيدەنتتەرىنىڭ وتىرىسىندا مۇنى ارنايى اتاپ وتكەن قىرعىز پرەزيدەنتى ساۋرانباي جيەنبەكوۆ توقاەۆ مىرزاعا العىسىن ايتىپ، ريزاشىلىعىن ءبىلدىردى. بۇل ەلدىڭ بەدەلىن ارتتىرار جۇمساق كۇشكە جاتاتىن قادامداردىڭ ءبىرى.
كارانتين جاريالانعالى 30 كۇننەن استام ۋاقىتتى باقىلاپ وتىرساڭىزدار قازاقستان تاراپىنىڭ ارەكەتتەرى پراگماتيكالىق باعىتتى ۇستاناتانىن اڭعارۋعا بولادى. ەموتسياسىز، ۋلاپ-شۋلاماي، ءار نارسە ولشەپ-پىسىلگەن ارەكەتتەردەن باستاۋ العان ساۋاتتى قادامدار ىسكە اسۋدا. بيلىككە كەلگەلى سوڭعى 1 جىلدا پرەزيدەنت توقاەۆتىڭ قادامدارىن سارالاساڭىز تاكتيكا، پراگماتيكا، سابىرلىق پەن اقىرىنداپ العا جىلجۋدى ۇستاناتىن ساياساتتى اڭعارۋعا بولادى. ءومىر سونى كورسەتۋدە.
سوڭعى ۋاقىتتارى ۋكراينادا پرەزيدەنت زە سىننىڭ استىندا قالىپ، بەدەلى مەن سەنىم كرەديتىن ءتۇسىرىپ جاتىر. ءدال وسى ۋاقىتتا بىزدە كەرىسىنشە پرەزيدەنتتىڭ بەدەلى مەن سالماعى قيىن كەزەڭدە اقىرىنداپ، بىراق سالماقتى جولمەن ارتىپ كەلە جاتقانىن اڭعارۋ قيىن ەمەس.
پرەزيدەنتتىڭ بيلىككە كەلگەلى 1 جىلداعى قادامدارىنان ساياساتكەر رەتىندە 3 ەرەكشەلىكتى تولىق ايتۋعا بولادى:
1. شىدامدى.
2. پراگماتيك.
3. پوپۋليزمنەن اۋلاق سالماقتى جۇرىستەردى جاسايتىن ساياساتكەر.
بۇدان ارمەن قالعان دۇنيەنىڭ ءبارى ءبىزدىڭ حالىققا بايلانىستى. قوعام پرەزيدەنتتى قولداپ وتىرسا ساياساتكەر رەتىندە پرەزيدەنت بۇل قيىنشىلىقتان ەلدى امان-ەسەن الىپ شىعاتىن قابىلەتكە يە ەكەندىگى بايقالادى. ءار نارسە ۋاقىت، ساعاتىمەن كەلەتىن جولدى ۇستانساق ەل رەتىندە ۇتىلمايمىز دەپ ويلايمىن. بىزدە باسقا تاڭداۋ مەن جول دا جوق.
باۋىرجان سەرىكباەۆ
