قىزىلوردا وبلىسىندا توتەنشە جاعداي سالدارىنان جۇمىسىن ۋاقىتشا توقتاتقان بىرقاتار كاسىپكەرلەر 42500 تەڭگە الەۋمەتتىك تولەمگە قول جەتكىزدى، دەپ حابارلايدى قازاقپارات ءتىلشىسى.
ولاردىڭ قاتارىندا قىزىلوردا قالاسىندا مەكتەپتەردە اسحانانى تاماق ونىمدەرىمەن قامتاماسىز ەتەتىن كاسىپكەر روزا قادىلكۇرمانوۆا دا بار. كاسىپكەر وبلىس ورتالىعىنداعى №43, 136 مەكتەپتەردە اتالعان جۇمىسپەن اينالىساتىن.
«توتەننەن كەلگەن قاۋىپتى ىندەت بارلىق سالاعا كەرى اسەرىن تيگىزدى. ەلىمىزدەگى، وڭىردەگى كارانتين كەزىندە ءبىزدىڭ دە تىنىس-تىرشىلىگىمىز توقتاپ قالدى. بۇل ساتتە مەملەكەت تاراپىنان تابىسسىز قالعان قازاقستاندىقتارعا قولداۋ كورسەتىلۋى زور قامقورلىق دەپ تۇسىنەمىن. مەن جانە وزىممەن بىرگە جۇمىس جاسايتىن ۇجىم مۇشەلەرى دە اتالعان تولەمگە قول جەتكىزدى. وسى ورايدا مەملەكەت باسشىسىنا، ۇكىمەتكە، بارلىق جاناشىر ازاماتتارعا العىس بىلدىرەمىن. ەلىمىز بۇل قيىندىقتى تەزىرەك جەڭىپ شىعادى دەپ سەنەمىن»، - دەدى كاسىپكەر.
قىزىلوردالىق تاعى ءبىر كاسىپكەر گاۋھار قالىمبەتوۆا دا مەملەكەت تاراپىنان كورسەتىلگەن قامقورلىققا ءدان ريزا ەكەنىن جەتكىزدى. ول ۆيزاجيست كاسىبىمەن اينالىساتىن ەدى. قازىر ول جۇمىسى توقتاپ تۇر.
«قيىندىق ەشكىمگە دە وڭاي سوعىپ جاتقان جوق. تابىسسىز قالعان ازاماتتارعا مەملەكەت تاراپىنان ءتيىستى قولداۋ جاسالدى. وسى ورايدا حالىققا بەرىلگەن تولەم كوپ وتباسىنىڭ مۇڭ-مۇقتاجىن شەشۋگە وڭ سەپتىگىن تيگىزدى. الداعى جارقىن كۇندەردە ەلىمىزدە كوپتەگەن يگىلىكتى ىستەرگە جول اشىلادى دەگەن ۇمىتتەمىن. ەلىمىز دامىپ، وركەندەي بەرسىن»، - دەدى ول. توتەنشە جاعدايدا مۇقتاج ازاماتتارعا كورسەتىلەتىن الەۋمەتتىك قولداۋ نەگىزىندە 98 مىڭنان استام ازاماتقا تولەم تۇسكەن.
"قازاقپارات"
