Qyzylorda oblysynda tótenshe jaǵdaı saldarynan jumysyn ýaqytsha toqtatqan birqatar kásipkerler 42500 teńge áleýmettik tólemge qol jetkizdi, dep habarlaıdy QazAqparat tilshisi.
Olardyń qatarynda Qyzylorda qalasynda mektepterde ashanany tamaq ónimderimen qamtamasyz etetin kásipker Roza Qadylkurmanova da bar. Kásipker oblys ortalyǵyndaǵy №43, 136 mektepterde atalǵan jumyspen aınalysatyn.
«Tótennen kelgen qaýipti indet barlyq salaǵa keri áserin tıgizdi. Elimizdegi, óńirdegi karantın kezinde bizdiń de tynys-tirshiligimiz toqtap qaldy. Bul sátte memleket tarapynan tabyssyz qalǵan qazaqstandyqtarǵa qoldaý kórsetilýi zor qamqorlyq dep túsinemin. Men jáne ózimmen birge jumys jasaıtyn ujym músheleri de atalǵan tólemge qol jetkizdi. Osy oraıda Memleket basshysyna, Úkimetke, barlyq janashyr azamattarǵa alǵys bildiremin. Elimiz bul qıyndyqty tezirek jeńip shyǵady dep senemin», - dedi kásipker.
Qyzylordalyq taǵy bir kásipker Gaýhar Qalymbetova da memleket tarapynan kórsetilgen qamqorlyqqa dán rıza ekenin jetkizdi. Ol vızajıst kásibimen aınalysatyn edi. Qazir ol jumysy toqtap tur.
«Qıyndyq eshkimge de ońaı soǵyp jatqan joq. Tabyssyz qalǵan azamattarǵa memleket tarapynan tıisti qoldaý jasaldy. Osy oraıda halyqqa berilgen tólem kóp otbasynyń muń-muqtajyn sheshýge oń septigin tıgizdi. Aldaǵy jarqyn kúnderde elimizde kóptegen ıgilikti isterge jol ashylady degen úmittemin. Elimiz damyp, órkendeı bersin», - dedi ol. Tótenshe jaǵdaıda muqtaj azamattarǵa kórsetiletin áleýmettik qoldaý negizinde 98 myńnan astam azamatqa tólem túsken.
"QazAqparat"
