بۇگىن قر پرەمەر-ءمينيسترى ولجاس بەكتەنوۆتىڭ توراعالىعىمەن ۇكىمەت وتىرىسى ءوتتى. كۇن تارتىبىندە ماشينا جاساۋدى دامىتۋ ماسەلەلەرى قارالىپ، وڭدەۋ ونەركاسىبىنىڭ ەكونوميكاداعى ۇلەسى تاۋ-كەن سالاسىنان اسىپ، تۇراقتى ءوسىم كورسەتكەنى ايتىلدى. جيىنعا وبلىس اكىمى نۇرلىبەك نالىباەۆ سەلەكتورلىق رەجيمدە قاتىستى.
ۇكىمەت وتىرىسىنان كەيىن ايماق باسشىسى ارنايى ءماجىلىس وتكىزىپ، جاۋاپتى سالا ماماندارىنا شاعىن جانە ورتا كاسىپكەرلىكتى دامىتۋ، اتاۋلى الەۋمەتتىك كومەك كورسەتۋ مەن بيۋدجەتتىڭ يگەرىلۋى بويىنشا تاپسىرمالار جۇكتەدى.
«بيىل جەكە كاسىپكەرلەردىڭ 3 مىڭعا جۋىق جوباسىنا 42 ملرد. 500 ملن. تەڭگە كولەمىندە قارجىلاي قولداۋ كورسەتىلدى. دەگەنمەن، ايماقتا دارا كاسىپكەرلەر سانىنىڭ ءوسۋ قارقىنى وتكەن جىلمەن سالىستىرعاندا تومەندەگەن. ءاربىر اكىم ءوزى باسقاراتىن ەلدى مەكەندەگى جۇمىسسىزدار سانىن ازايتۋ، جاڭا جۇمىس ورىندارىن اشۋ، حالىقتىڭ تابىس كوزىن ارتتىرۋ سەكىلدى نەگىزگى شارالارعا باسا نازار اۋدارۋى كەرەك. مەنىڭ تاپسىرماممەن جىل باسىندا الەۋمەتتىك كومەك الۋشىلار سانىن 30 پايىزعا تومەندەتۋ تۋرالى ءتيىستى باسقارمانىڭ، قىزىلوردا قالاسى مەن اۋدان اكىمدىكتەرىنىڭ جوسپارى بەكىتىلدى. شىنايى تابىسىن جاسىرىپ، جالعان اقپارات ۇسىنىپ، ماسىلدىق ويمەن كومەك الۋ ءۇشىن تۇرعىندار ءتۇرلى ارەكەتتەرگە بارۋدا. اتاۋلى الەۋمەتتىك كومەك تەك شىن مۇقتاج وتباسىلارعا عانا بەرىلۋى قاجەت. قالا جانە اۋدان اكىمدەرىنە ۋچاسكەلىك كوميسسيالاردىڭ جۇمىسىن كۇشەيتىپ، جىل سوڭىنا دەيىن بەلگىلەنگەن جوسپاردى ورىنداۋدى تاپسىرامىن»، – دەدى ن.نالىباەۆ.
ايتا كەتەيىك، وتكەن جىلدىڭ قورىتىندىسىمەن جاستاردىڭ كاسىپكەرلىك باستاماسىنا شاعىن نەسيە الۋ بويىنشا قىزىلوردا وبلىسى رەسپۋبليكادا ەكىنشى ورىندى يەلەنىپ، 492 ازامات كاسىبىن باستاعان.
سونىمەن قاتار، قىزىلوردا وڭىرلىك ينۆەستيتسيالىق ورتالىعىنىڭ نەسيەلەندىرۋ جۇمىسىن جانداندىرىپ، اۋىل شارۋاشىلىعى ونىمدەرىن وڭدەۋ سالاسىن دامىتۋعا 1 ملرد. 500 ملن. تەڭگە قارجى ءبولىندى.
وسىلايشا شاعىن جانە ورتا كاسىپكەرلىكتىڭ ءونىم شىعارىلىمى 33,6 پايىزعا ۇلعايىپ، وبلىس رەسپۋبليكاداعى العاشقى ۇشتىكتەن كورىندى.بيىل اتاۋلى كومەككە 5 ملرد. 900 ملن. تەڭگە قارجى ءبولىنىپ، 9 ايدىڭ قورىتىندىسىمەن 31 869 ادامعا 2 ملرد. 100 ملن. تەڭگە تولەندى.
