2020 جىلدىڭ 14 ءساۋىر كۇنى “كوكشەتاۋ-قوستاناي” اينالما اۆتوجولىندا، اقمولا وبلىسى بويىنشا كولىكتىك باقىلاۋ ينسپەكتسياسىنىڭ ماماندارى جىلجىمالى كولىكتىك باقىلاۋ بەكەتىندە كەزەكشىلىك اتقارعان كەزدە رەسەي فەدەراتسياسىندا تىركەلگەن
م/ن E006TB72 (م/ن 57KEA03 تىركەمەسى), جۇك – استىق تاسىمالدايتىن "كاماز 53205" ماركالى شەتەلدىك اۆتوكولىك قۇرالىن توقتاتتى.
جۇكتەردى كابوتاجدىق تاسىمالداۋدى جۇزەگە اسىرۋ قر زاڭناماسىمەن تىيىم سالىنعان.
بۇل رەتتە، قۇجاتتاردى تەكسەرۋ بارىسىندا جۇرگىزۋشى تاسىمالداناتىن جۇككە قۇجاتتاردى ۇسىنباستان، اۆتوكولىك قۇرالىن ولشەۋدى جۇرگىزۋدەن باس تارتا وتىرىپ، اۆتوكولىك قۇرالىن مەملەكەتتىك تىركەۋ تۋرالى كۋالىكتى عانا ۇسىنعان. جۇرگىزۋشى اۆتوكولىك قۇرالىن توقتاعان جەرىنە قالتىرىپ، بەلگىسىز باعىتقا ءجۇرىپ كەتكەن.
وسىدان كەيىن، ماماندار ۇستالعان اۆتوكولىك قۇرالىن كۇزەتۋگە كىرىستى.
كەزەكشىلىك بارىسىندا ماماندارعا كولىكتىك باقىلاۋ جۇرگىزبەي، ياعني جۇمىستارىنا كەدەرگى كەلتىرىپ، توقتاتىلعان اۆتوكولىك قۇرالىن سەبەپسىز جىبەرۋدى تالاپ ەتىپ بەلگىسىز تۇلعالار كەلگەن.
ءوز كەزەگىندە، قاۋىپ-قاتەرگە قاراماستان، بەكەت قىزمەتكەرلەرى وزدەرىنىڭ لاۋازىمدىق مىندەتتەرىن ورىنداپ، نورماتيۆتىك-قۇقىقتىق اكتىلەردى باسشىلىققا الا وتىرىپ، جۇكتىڭ شىعۋ زاڭدىلىعىن راستايتىن قۇجاتتاردى ۇسىنۋدى تالاپ ەتتى.
2020 جىلدىڭ 15 ساۋىرىندە ساعات 14:15-تە بەكەت ماماندارىنا مەملەكەتتىك تىركەۋ ءنومىرسىز ءۇش جەڭىل اۆتوكولىكپەن (Lexus 470 قارا ءتۇستى، Toyota Land Cruiser 200 شيە ءتۇستى جانە Lada Largus اق ءتۇستى) كەلگەن 5-6 ادامنان تۇراتىن بەلگىسىز تۇلعالار شابۋىل جاسادى.
وسى ورايدا، بەلگىسىز تۇلعالار قىزمەتكەرلەردىڭ ءومىرى مەن دەنساۋلىعىنا قاۋىپ ءتوندىرىپ، ۇستالعان اۆتوكولىك قۇرالىنا جىلجىمالى بەكەت ىشىندەگى قۇجاتتاردى الىپ، اۆتوكولىك شينالارىن تەسىپ، ۇستالعان اۆتوكولىك قۇرالىن جۇرگىزىپ اكەتكەن.
كولىكتىك باقىلاۋ بەكەتىنىڭ قىزمەتكەرلەرى بولعان وقيعا تۋرالى دەرەۋ "102" كەزەكشى پوليتسيا نومىرىنە حابارلاعان.
قازىرگى ۋاقىتتا، جەدەل-ىزدەستىرۋ ءىس-شارالارى بارىسىندا جۇك كولىگى تابىلدى، شابۋىل جاساعان ادامداردى ىزدەۋ جانە كريميناليستيكالىق جۇمىستاردى اقمولا وبلىسى پوليتسيا دەپارتامەنتىنىڭ قىزمەتكەرلەرى جۇرگىزۋدە.
ايتا كەتسەك، توتەنشە جاعداي كەزىندە اعىمداعى جىلدىڭ 22 ناۋرىزىنان باستاپ قر اۋىل شارۋاشىلىعى مينيسترلىگى بيداي ەكسپورتىنا تىيىم سالعانىن ەسكەرۋ قاجەت.
انىقتاما: قر "اكىمشىلىك قۇقىق بۇزۋشىلىق تۋرالى" كودەكسىنىڭ 575-بابىنا سايكەس، قازاقستان رەسپۋبليكاسىنىڭ اۋماعىندا ورنالاسقان پۋنكتتەر اراسىندا شەت مەملەكەتتىڭ اۋماعىندا تىركەلگەن اۆتوكولىك قۇرالدارىمەن جۇكتەردى تاسىمالداۋ 100 اەك مولشەرىندە جانە كودەكستىڭ 571-1-بابىنىڭ 1-تارماعىنا سايكەس تاسىمالداۋشىنىڭ تاۋار-كولىك جۇكقۇجاتىن (ولشەۋ نەمەسە ولشەۋ اكتىسىن، CMR) ۇسىنباۋى ءۇشىن 20-دان 60 اەك-كە دەيىن ايىپپۇل سالۋعا اكەپ سوعادى.
قر يدم كولىك كوميتەتىنىڭ ءباسپاسوز قىزمەتى
