تاريحتى تانىتاتىن جادىگەرلەر

719

تاراز...اسان قايعى بابامىز "تاياق تاستاساڭ تال بولىپ وسەتىن جەر" دەپ سيپاتتاعان قاسيەتتى مەكەن. تاريحتىڭ تالاي كوشى ءجۇرىپ وتكەن كونە شاھار.  تاراز قالاسىن اۋىزعا العاندا،مۇنداعى كونەنىڭ كوزىندەي بولعان كورنەكتى ەسكەرتكىشتەرگە توقتالماۋ مۇمكىن ەمەس. ەندەشە، قالاداعى "كەشەگىنىڭ كۋاسى" بولعان ەسكەرتكىش اتاۋلىنىڭ بۇگىنگى ماڭىزى قانداي ەكەنىن سارالايىق.

ەسكەرتكىش ءسوزىنىڭ ءوزى "الدەنەنى ەسكەرتەر، ەسكە تۇسىرەر نارسە" دەگەن ۇعىمدى بىلدىرسە كەرەك-ءتى.تارازداعى قاراحان، تەكتۇرماس، ايشا ءبيبى، بابادجا قاتىن جانە ت.ب ەسكەرتكىشتەر بىزگە نەنى ەسكە تۇسىرۋدە؟تاريحتى ما الدە ەسكى نانىم-سەنىمدى مە؟

ەسكەرتكىشتەردىڭ قايتا قالپىنا كەلتىرىلىپ، قورعالۋىنىڭ نەگىزگى سەبەبى كەلەر ۇرپاقتى تاريحي تۇلعالار ومىرىنەن، تاريحي وقيعالاردان، ەجەلگى مادەنيەت ۇلگىلەرىنەن حاباردار ەتۋ ەكەنى انىق. الايدا، ءوز باسىم جوعارىدا اتالعان كەسەنەلەرگە وتكەنىن تانۋ ماقساتىمەن بارعان ادامداردى كورگەنىم جوق. كورگەنىم مىناۋ:جاس-جۇبايلاردىڭ ۇيلەنۋ توي كۇنى كەسەنەلەرگە كىرىپ، باقىتقا كەنەلۋلەرىن تىلەۋى.ەجەلگى اتا-بابالارىمىزدا "اتا-بابا ارۋاعىنا سيىنۋ" دەگەن نانىمنىڭ بولعانىن تاريح دالەلدەيدى.الايدا،ەلباسىمىز "بولاشاققا باعدار:رۋحاني جاڭعىرۋ" ماقالاسىندا ايتقانداي، "كەجەگەسى كەرى تارتاتىن ادەتتەردى ۇلتتىق سانا اياسىندا سۇرلەپ قويۋعا بولمايدى."

قازاقتىڭ بىرقۇدايلىققا كوشىپ، جاراتۋشىعا جالبارىنا باستاعانىنا قاي زامان. ەندەشە، رۋحاني ارتتا قالۋشىلىققا جول بەرمەي، تاريحي ەسكەرتكىشتەرگە ءتاۋ ەتۋدەن باس تارتاتىن ۋاقىت كەلىپ جەتتى. تاريحي ەسكەرتكىشتەر تاريحتى تانىتاتىن جادىگەرلەر رەتىندە باعالانۋى ءتيىس.

گاۋھار اۋەسحان

ءال فارابي اتىنداعى قازۇۋ فيلولوگيا جانە الەم  تىلدەرى فاكۋلتەتىنىڭ ستۋدەنتى

عىلىمي جوبا جەتەكشىسى: ف. قوزىباقوۆا،

ءال فارابي اتىنداعى قازاق ۇلتتىق ۋنيۆەرسيتەتى تاريح جانە ارحەولوگيا، ەتنولوگيا فاكۋلتەتىنىڭ

قازاقستان تاريحى كافەدراسىنىڭ پروفەسسورى

پىكىرلەر
رەداكتسيا تاڭداۋى