قاڭىراعان اۋەجاي تەرمينالى. كورنەكى سۋرەت.
ەۋروپا كوميسسياسىنىڭ ۆيتسە-پرەزيدەنتى مارگاريتيس سحيناس 8 ءساۋىر كۇنگى مالىمدەمەسىندە وداققا مۇشە ەلدەردىڭ الەۋمەتتىك وقشاۋلانۋ شارالارىن ءساتتى جۇزەگە اسىرعانىن اتاپ ءوتىپ، شەكتەۋ شارالارىن جالعاستىرۋدىڭ ماڭىزىنا توقتالعان.
"العاشقى ناتيجەسىن دە كورىپ وتىرمىز، سول سەبەپتى ساياحاتتاۋعا شەكتەۋ مەرزىمىن ۇزارتۋ ىندەتتىڭ جايىلۋ قاۋپىن ازايتۋ ءۇشىن قاجەت" دەدى ول.
قازىر ەۋروپا وداعى ازاماتتارى، وداق رەزيدەنتتەرى، ەو ازاماتتارىنىڭ وتباسى مۇشەلەرى، ترانزيتتىك جولاۋشىلار، ديپلوماتتار، دەنساۋلىق ساقتاۋ سالاسى ماماندارى، گۋمانيتارلىق سالا وكىلدەرى، وتباسى جاعدايىنا بايلانىستى جول جۇرۋگە ءماجبۇر ازاماتتار عانا وداق اۋماعىنا كىرە الادى.
بۇعان دەيىن ەۋرووداقتىڭ كەيبىر مۇشەلەرى كوروناۆيرۋستىڭ ەكونوميكاعا ىقپالىن ازايتۋ ءۇشىن شەكتەۋ شارالارىن بىرتىندەپ ازايتاتىنىن مالىمدەگەن ەدى. الايدا وداقتىڭ وزگە مۇشەلەرى شەكتەۋ شارالارىن ازايتسا، ۆيرۋس بۇدان دا جىلدام تاراپ، ماسەلە باقىلاۋدان شىعا ما دەپ قاۋىپتەنەدى.
وداق اۋماعىندا كوروناۆيرۋستان 51 مىڭ ادام كوز جۇمعان. ۆيرۋستان يتاليا، يسپانيا، فرانتسيا قاتتى زارداپ شەككەن.
"ازاتتىق" راديوسى
