باۋىرجان سەرىكباەۆ: "قازاقشا سويلەمەدى", "تۇرمەدەن دجيپپەن شىقتى" دەگەن قوعام بۇل گەنيدى دە باعالامايدى-اۋ...

10166
Adyrna.kz Telegram

مۇحتار جاكيشەۆتىڭ ەفيرى بولدى. ءبىر مەزگىلدە 2900 ادام قاراپ وتىردى. نەگىزگى ويلارى:

1. دەنساۋلىعىما بايلانىستى كۇنىنە 2 ساعات قانا جۇمىس ىستەي الامىن.

2. ەلدەگى ەكونوميكالىق جاعدايعا قاتىستى تولىق اقپاراتىم جوق. سوندىقتان بەلگىلى ءبىر ساراپتاما جاساۋدان اۋلاقپىن. مەن ءومىر بويى اقپاراتىم تولىق ەمەس سالالاردا پىكىرىمدى بىلدىرگەن ەمەسپىن.

3. اتوم ەلەكتر ستانتسياسى قازاقستانعا كەرەك. بىزگە قۋات كۇشى 300 مگب اتوم ستانتسياسى قاجەت.

4. اتوم ستانتسياسىنىڭ جۇمىس ىستەۋ مەرزىمى ورتا ەسەپپەن 60 جىل. بۇل تۇتىنۋشىعا ارزان ەلەكتر قۋاتىن پايدالانۋعا مۇمكىندىك بەرەدى.

5. "ەفيرگە شىقپاڭىز، "نۇربوتتار" ءارتۇرلى سۇراق قويادى" دەگەندەرگە ايتارىم مەن سونداي ومىرلىك تاجىريبەدەن وتكەن اداممىن مەنى بەلگىلى ءبىر كوممەنتتەرمەن ويىمنان اينىتۋ قيىن.

6. مەنىڭ جاقسى كورەتىن ءىسىم - جاڭا جۇمىس ورىندارىن اشاتىن كاسىپورىندار قۇرۋ.

7. كارانتين كەزىندە بارىنشا قاۋىپسىزدىك ەرەجەلەرىن ساقتاعان ءجون. اسقىنىپ كەتسە ءبىزدىڭ مەديتسينانىڭ شاماسى جەتپەيدى ءارى ەكونوميكاعا زيانى دا ارتادى.

8. ۆيرۋستى بەلگىلى توپتار ۆاكتسينا ساتۋ ءۇشىن نەمەسە باسقا ماقساتتا ادەيى شىعاردى دەپ ويلامايمىن. بۇل اۋراۋدان بۇكىل الەم ەكونوميكاسى ەڭ ۇلكەن زارداپتار مەن شىعىنداردى كورىپ جاتىر.

9. بۇل كريزيس 2008 جىلى بولعان كريزيستەن دە اۋىر بولادى. سەبەبى تەك مۇناي باعاسى ءتۇسىپ جاتقان جوق. ەكونوميكانىڭ قىزمەت كورسەتۋ، شاعىن جانە ورتا بيزنەس سالالارى توقتاپ جاتىر. ولار بيۋدجەتكە سالىق تولەمەگەنىمەن قويماي، مەملەكەتتىڭ قولداۋىنا دا مۇقتاج.

جالپى العاندا ءبىر دەممەن تىڭداپ شىقتىم. قۇرمەتىم ارتتى. ءبىلىمدى. 11 جىل تۇرمە سىندىرماعان. رۋحتى.

ەفيرىن كورىپ وتىرىپ قوعامعا جانىم اشىدى. "قازاقشا سويلەمەدى", "تۇرمەدەن دجيپپەن شىقتى" دەگەن قوعام بۇل گەنيدى دە باعالامايدى-اۋ. قور قىلىپ جىبەرمەسە ەكەن دەگەن وي قايتا-قايتا ويىما كەلە بەردى. ءبىلىمى كوپ قازاقتى ون وراپ الاتىن، 11 جىل تۇرمەدە وتىرسا دا سىنباعان تۇلعانى الداعى ۋاقىتتا بالاعىنان تارتىپ، ءار جەردەن ءبىر ءۇرىپ، جوق قىلىپ تاستاماسا ەكەن ءبىزدىڭ قوعام. وتە ناشار قوعامدىق دەڭگەيدەمىز ءبىز قازىر. شىنى وسى.

پىكىرلەر