پارلامەنت ءماجىلىسىنىڭ دەپۋتاتى ومارحان وكسىكباەۆ قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ «بىرلەسە بىلگەن ەل ءبارىن جەڭەدى» اتتى ماقالاسىنا قاتىستى پىكىرىن ءبىلدىردى، دەپ حابارلايدى قازاقپارات ءتىلشىسى.
«ەلباسىنىڭ ماقالاسىن مۇقيات وقىپ شىقتىم. نۇرسۇلتان نازارباەۆ تاعى دا حالقىمەن بىرگە ەكەنىن كورسەتىپ وتىر. قازىرگى تاڭدا الەمدى شارلاپ كەتكەن كوروناۆيرۋس دەرتىنىڭ قاتەرلى ەكەنىن، ول قازاقستانعا عانا ەمەس، بۇكىل مەملەكەتتەرگە قاۋىپ ءتوندىرىپ جاتقانى ايتىلىپ وتىر. بۇگىنگى تاڭدا ەلباسى حالىققا ءبىز بىرگە بولساق، ءتارتىپتى ەل بولساق، جۇمىلا كوتەرگەن جۇك جەڭىل تۇسەتىنىن جەتكىزدى. ەڭ باستىسى قيىنشىلىقتى جەڭە الاتىن سارابدال ساياسات پەن ءتيىستى قوردىڭ بارلىعى دا ۇمىت قالدىرىلماي، مەملەكەتتىڭ قاۋقارى، قارجىلىق مۇمكىندىكتىڭ بارىن، ەكونوميكانىڭ تۇراقتىلىعىن كورسەتتى»، - دەدى ومارحان وكسىكباەۆ قازاقپارات تىلشىسىنە تەلەفون ارقىلى ايتقان پىكىرىندە.
ءماجىلىس دەپۋتاتىنىڭ ايتۋىنشا ىندەتتى ەڭسەرۋ ماقساتى – مەملەكەت پەن ۇكىمەت قولعا العان شارالاردان بولەك حالىقتىڭ بىرلىگىن دە تالاپ ەتەدى. «تاۋەلسىزدىكپەن بىرگە تۋعان جاستاردىڭ كۇش-قايراتىن كورسەتىپ، مۇمكىنشىلىگىن تانىتاتىن، ۇلكەندەردىڭ جاستارعا اقىل ايتىپ، پاراساتتىلىققا شاقىرىپ، ەل بىرلىگىن تانىتاتىن كەزەڭنىڭ كەلگەنىن كورسەتتى. قيىن كەزەڭدە ەلگە قول ۇشىن سوزعان كاسىپكەرلەرىمىزدەن باستاپ ءار سالادا الدىڭعى قاتاردا جۇرگەن ازاماتتارىمىزدىڭ ەڭبەگى ەرەكشە اتالىپ ءوتتى.
بۇل ماقالا - حالقىمىزدى سابىرعا شاقىراتىن، ەلدىگىمىزدى ساقتاۋدا باس قوسۋ كەرەكتىگىن باسا ايتقان، ۇنجىرعامىزدى تۇسىرمەي، ەڭسەمىزدىڭ كوتەرىپ، قازاقتىڭ باسىنان وتەتىن بۇل دا ءبىر كەزەڭ ەكەنىن ەسكە سالىپ وتىر دەپ ايتار ەدىم»، - دەپ ءتۇيدى ءماجىلىس دەپۋتاتى. ەسكە سالا كەتسەك بۇگىن تاڭەرتەڭ قر تۇڭعىش پرەزيدەنتى – ەلباسى نۇرسۇلتان نازارباەۆتىڭ «بىرلەسە بىلگەن ەل ءبارىن جەڭەدى» اتتى قازاقستاندىقتارعا ۇندەۋى جاريالانعان ەدى.
قازاقپارات
