76 كۇن بويى سىرتقى الەمنەن وقشاۋلانعان ۋحاندا 8 ساۋىرگە قاراعان ءتۇنى قالادان شىعاتىن جولدار اشىلدى. دەگەنمەن، قىتاي بيلىگى كوروناۆيرۋستىڭ تارالۋ وشاعى بولعان ۋحاننان شىعۋعا ءالى رۇقسات بەرمەگەن بۇل تۋرالى ريا نوۆوستي حابارلايدى.
23 قاڭتاردان باستاپ حۋبەي پروۆينتسياسىنىڭ ورتالىعى كوروناۆيرۋستىڭ ورشۋىنە بايلانىستى ءىس جۇزىندە وقشاۋلانعان. قالامەن كولىك بايلانىسى تولىعىمەن توقتاتىلعان، ونىڭ ىشىندە مەترو، اۆتوبۋستار، پارومدار، سۋ كولىگى قالاعا كىرمەيتىن، اۋەجاي جانە تەمىرجول ستانتسيالارى جۇمىس ىستەمەيتىن. تۇرعىندارعا ەرەكشە قاجەتتىلىك بولماسا، قالدان شىعۋعا تولىقتاي تىيىم سالىنعان بولاتىن.
ۋحاندا 28 ناۋرىزدان باستاپ قالاعا كىرەتىن تەمىرجول بايلانىسى قالپىنا كەلتىرىلىپ، 8 ساۋىردەن باستاپ شىعۋعا جول اشىلدى. اۋە قاتىناسى دا جارتىلاي قالپىنا كەلتىرىلۋدە.
بۇعان دەيىن قىتاي بيلىگى ۋحان تۇرعىندارىنىڭ دەنساۋلىعى جاقسى جانە اينالاسىنا قاۋىپ توندىرمەگەن جاعدايدا عانا قالادان شىعۋعا رۇقسات بەرەلەتىنىن حابارلاعان.
CGTN تەلەارناسىنىڭ حابارلاۋىنشا، بۇگىندە قالا حالقى بىرتىندەپ قالىپتى ومىرگە ورالۋدا. تۇرعىندار ءداستۇرلى كەسپەدەن ءدام تاتىپ، بىرنەشە ايدان كەيىن ساۋدا-ساتتىق ءۇشىن دۇكەنگە شىعا باستاعان.
كوروناۆيرۋستان امان قالعان كوپتەگەن قالا تۇرعىندارى ەرەكشە قۋانىشتى.
مەنىڭ ەڭ ۇلكەن تىلەگىم – ومىردەن ءلاززات الىپ، ودان جاقسىلىقتى كورۋ، - دەيدى قالا تۇرعىنى.
ال ينفەكتسيامەن كۇرەس ايماعىندا بولعان مەديتسينا قىزمەتكەرى تىپتەن ءداستۇرلى تاعامدارىنىڭ ءدامى ءتىل ۇيىرەتىنىن مويىنداعان.
مەن اۋرۋحانادا جۇمىس ىستەدىم، سوندىقتان ەكى اي بويى كەسپە جەگەن جوقپىن. قازىر ءدامىنىڭ ەرەكشە ەكەنىن سەزىنىپ وتىرمىن. كارانتين كەزىندە ماعان وسى ءدامنىڭ قالاي جەتىسپەگەنىن بىلسەڭىز عوي، - دەپ مويىندادى جەرگىلىكتى مەيىربيكە.
