الماتىدا ۇشاق جولاۋشىسى ماس كۇيىندە بورتقا وتىرماقشى بولىپ، پوليتسياعا باعىنباعانى ءۇشىن رەيستەن شىعارىلىپ، قاماۋعا الىندى، - دەپ حابارلايدى “ادىرنا” ۇلتتىق پورتالى قر ىشكى ىستەر مينيسترلىگىنە سىلتەمە جاساپ.
جولاۋشى الماتىدان سوچيگە ۇشپاق بولعان. ۇشاققا وتىرعىزۋ كەزىندە ول ماس كۇيىندە اۆياكومپانيا قىزمەتكەرلەرىنە ادەپسىز سوزدەر ايتىپ، اگرەسسيۆتى مىنەز كورسەتىپ، تۇسىنىكتەمەلەرگە جاۋاپ بەرمەگەن.
"تۇتقىنداۋ كەزىندە ايەل پوليتسيانىڭ تالابىن ورىنداماعان. اۋەجايداعى جەلىلىك پوليتسيا ءبولىمىنىڭ قىزمەتكەرلەرى ونىڭ ۇستىنەن ماس كۇيىندە قوعامدىق ورىنعا شىققانى، ۇساق بۇزاقىلىق جاساعانى جانە ءتارتىپ ساقشىسىنىڭ زاڭدى تالابىنا باعىنباعانى ءۇشىن اكىمشىلىك حاتتاما تولتىردى. ماتەريال سوتقا جىبەرىلدى", – دەدى ىشكى ىستەر مينيسترلىگىنىڭ ءباسپاسوز قىزمەتى.
ۇستالعان ازامات بۇعان دەيىن دە الكوگولدىك ىشىمدىك ىشكەنى ءۇشىن اكىمشىلىك جاۋاپقا تارتىلعانى بەلگىلى بولدى. سوت قاۋلىسىمەن قۇقىق بۇزۋشى 15 تاۋلىككە اكىمشىلىك قاماققا الىندى.
